方力申近日正忙於宣傳新片《我的最愛》，前晚應邀出席《蘋果》網站直播節目《娛樂開CHAT》，與一眾網友分享拍攝新戲時的喜與樂。訪問中，小方透露當初接拍該片，最令他感到錯愕的是要扮演一個情場騙子，欺騙鄧麗欣（Stephy）的感情，小方更大爆拍攝其中一幕與Stephy的醉酒床上戲前曾經自隊，實行把自己灌醉幫助投入角色。
小方還在節目中大談對幾位緋聞女友的感覺，讚Stephy很多優點，周麗淇性格爽朗，而鍾欣桐（阿嬌）則十分懂得照顧人及令人有開心的感覺。最後，他還玩了一個心理測驗，雖然結果顯示他是一個「天生工作狂」，但他卻認為自己像「天生自戀狂」多一點。大家可登入《蘋果》網站 http://ent.appledaily.com隨時重溫節目。採訪：懷鈺、林惠卿 攝影：陳順禎
最想夥拍鄭中基 旺角Helen
Helen：頭先聽你講剛剛拍完套戲，咁你今年喺唱歌同拍戲方面，會將啲時間點分配呀？
Alex：上年我擺咗好多時間喺電影度，唱歌就少啲，但冇辦法，因為我自己都知道喺香港雙線發展係好難，觀眾、聽眾或者歌迷都係要儲，上年我其實喺度累積緊我嘅經驗同歌迷。今年我已經有一部戲，嚟緊仲有一部《出水芙蓉》會上，唱片我呢個月會出《新歌+精選》，公司亦同我講暑假或之後會出一隻大碟，聽落我今年唱歌同電影都幾平均，所以我會更加努力，希望會有更好嘅作品畀到大家睇。
Helen：你之前已經同Stephy合作拍過幾套戲，如果有機會畀你揀，你最想同邊個合作？
Alex：其實我最想同鄭中基合作，我想睇吓兩個男仔可以做到啲乜嘢，同好耐冇一啲兩個男仔儍儍更更嘅喜戲。我暫時都係希望可以娛樂到觀眾，所以希望有套開心嘅，同Ronald拍下好似以前《咖喱辣椒》咁嘅戲，我都覺得幾得意。
立志終身做藝人 將軍澳彤彤
彤彤：你入咗娛樂圈都好多年，你覺得自己變化最大係乜嘢？
Alex：心態上，我一開始入行仲未覺得自己係一個藝人，仲係覺得呢份工好似一個課外活動，覺得好新鮮，乜都試吓、玩吓。但到𠵱家，我覺得呢個真係我嘅終身職業，我會以呢份工為我終身職業，希望我工作上可以得到人認同，自己做出嚟會有人鍾意，我覺得心態上係會變得更加積極。
寒冬拍戲呻辛苦 將軍澳阿家、阿瑩
阿家：我想問你拍新戲時有冇乜嘢搞笑場面出現？
Alex：其實都好多，我好開心拍呢套戲，係因為我哋成crew人都係隔咗一年又再合作，個感覺係好舒服、好輕鬆，一啲壓力都冇。最鍾意係我同朱咪咪嗰場，因為咪咪姐會臨時爆肚，而且我覺得自己都有啲喜劇細胞，希望觀眾睇完之後都會畀啲意見，會唔會覺得小方將來可以演吓喜劇。
阿瑩：你喺呢套戲裏面最辛苦係乜嘢？
Alex：最辛苦係時間好長，因為呢套戲係我哋公司嘅，所以係好多OT，我最長試過連續拍30幾個鐘，跟住計埋返屋企都係得6個鐘休息，之後又再拍30個鐘，嗰段時間仲係香港寒冷警告最長嘅時候，我要凌晨喺街度拍戲，好凍，我覺得呢套戲係我入行以來最辛苦嘅一套。
初扮壞人有壓力 旺角Tiger
Tiger：你拍咗呢系列嘅三套電影，你覺得今次呢套同之前有乜嘢唔同？
Alex：今次《我的最愛》我一開始就係壞人，之前兩套我都係好人，中間可能有少少做錯事，但今次我係一開始已經係一個比較利益行先嘅人，呢套戲同我性格完全唔同。仲有呢套戲畀到我好大挑戰，因為導演刻意加重我嘅角色戲份，想我串連多啲其他唔同角色，所以我嘅壓力比之前兩套更加大。
娛樂開CHAT：裕美、何超儀下周同你Chat
各位娛樂版擁躉，有興趣和你的偶像傾談嗎？《娛樂開CHAT》將請來裕美和何超儀擔任嘉賓，分別於3月11日（周二）和12日（周三）跟讀者談天說地，若想一睹她們的風采，請於當日6:00pm登入 http://ent.appledaily.com即可，節目於當晚7:00pm在《蘋果》網站直播。
