紅顏知己可以係倒米壽星（睇吓郭生嗰件就知），亦都可以好幫得手，睇超人李嘉誠嘅好知己周凱旋就知，佢作為TOM集團（2383）大股東，可以話係女強人，不過做得知己嘅，都有一個共通點，就係低調，所以就算周小姐幫超人檔3仔諗到新橋發大手機嘅業務，佢都貫徹低調作風。
集中火力搵空姐
3仔條新橋又係點呢？家陣香港平均一個人有1.5部手機，大部份手機都有影相、可以聽歌，個市場可以話已經飽和到極點，班operator要突圍真係唔容易，所以近排3仔都要度番條新橋出嚟爭大啲份餅，佢哋最近大搞Skypephone，開闢第二手穖（secondphone）市場，部機仲喺業界GlobalMobileAwards度攞咗獎。咁呢啲咁hi-tech、又有諗頭嘅策略係邊個諗嘅呢？咪係當年一手將Skype網絡電話引入中國嘅周小姐囉！
Skypephone係乜？部手機賣1000蚊樓下，主要係畀人平平哋打IDD──入門月費最平百幾蚊有得玩，包埋一堆通話分鐘，而呢部機仲係唯一一部可以配合3LikeHome功能，等啲客仔可以喺3仔覆蓋嘅國家同地區用，慳番漫遊費……
3仔中人話，有同事早排去咗國泰城做roadshow，勁多機師、空姐同空中少爺幫襯，買親仲係兩部兩部咁買，而好多家長亦買嚟送畀留學海外嘅寶貝仔女㖭。嗱，呢招集中火力針對性攻向顧客群，省力之餘，又可以做得低調！
查實低調係周小姐嘅一貫作風，搞TOM係咁，搞Skype係咁，就連之前代超人基金睇吓投唔投資社交網站Facebook時都係咁！睇個勢，周小姐似乎先至係走在潮流尖端、不折不扣嘅IT女強人呢！
電郵：mailto:[email protected]