3月新開始，我諗亦都係〈早飛王〉連勝嘅開始，之前貼中布力般後又衰喺樸茨茅夫手上，今期決定以穩陣保本行先。研究過外國標準盤，發現曼城周六作客雷丁呢個平手盤最化算，至少冇得輸，怕咩賭？就揀曼城「叮」走雷丁。畢傑
我當然深究過曼城最近係幾沉，如果今次對手係第二隊嘅話，我都會貼其對家，只因雷丁狀態、表現比佢哋更沉。先講吓曼城，今周繼續有保加利亞左翼馬田柏杜夫停賽，後防主力米卡李察士又要長唞。
雷丁近期表現似紐記
不過，原本有傷嘅巴西中場艾蘭奴，聽講可以喺周六披甲，就算臨場唔出得，墨西哥小將卡斯廸奴呢排幾搶鏡，我信佢就嚟會取得首個英超入球。加埋馬華路禾尼、米高莊遜、艾利蘭同夏文等人壓陣，逐個秤都比雷丁好。
雷丁近期嘅表現，畀我有種似紐卡素嘅感覺，就係中場線有好手如史堤夫亨特等壓陣，但係前線硬係唔識入波。
睇番雷丁近9場聯賽輸足8場，對上8仗更加只得3個入球；球迷可以睇到呢3球波全部出現喺90分鐘嘅完場前階段，反映佢哋大部份時間都係破關乏術。係班波近期真係唔掂？抑或只係死靠幸運之神眷顧？球迷自己諗啦！
雷丁領隊郭甫早前搵前鋒奇雲杜里改打右中場，效果一般；最近又借走咗射手列達去英冠嘅查爾頓，諗住奇雲杜里打番箭頭會掂，點知都係靠占士夏柏同索尼兩位中後場球員先可以「士哥」，短期內隊波點執都冇用。仲有呀，科特廸瓦中場化爾續因病缺陣，格連列圖養緊傷，根拿臣及杜比利又有傷在身，陣容上郁唔到幾多。
曼城個人技術較佳
周六兩支近況欠佳嘅球隊對碰，但相比下雷丁始終更沉，我會揀個人技術較佳、兼且入球板斧較多的曼城，平手盤有走冇輸。
早飛王貼士
星期六16雷丁vs曼城
首選：曼城（平）
次選：雷丁雙（1.8）
冷選：曼城勝3:1（22）
《周末早飛超級重心》
紅軍勢勁再追「主勝」
星期六15
利物浦vs紐卡素2:0（5.5倍）
聯賽3連勝的利物浦近期攻力強勁，費蘭度托利斯分別對米杜士堡及韋斯咸更大演帽子戲法，腳風、走勢順決再追「主勝」。紐卡素仍然沒甚起色，杜夫及占士米拿表現雖搶鏡，奈何防線一掂即散，門將基雲長唞是致命傷。
熱刺韋斯咸打吡博「大」
星期日23
熱刺vs韋斯咸2:1（7倍）
熱刺自奪得英聯盃後得意忘形，上仗聯賽作客竟爆大冷負伯明翰1:4，今周迎韋斯咸時活基治、戴臣及基拔圖料可披甲，收拾心情後應可贏回一仗，博倫敦打吡戰開「大」。韋斯咸今役傷兵還包括艾法寧頓、基舒、比拿美及柏加等。
阿仙奴贏兩球唔難
星期日25
韋根vs阿仙奴1:3（12倍）
韋根近期雖只曾擊敗過榜尾打比郡及積弱的韋斯咸，但面對車路士及愛華頓等前列分子亦能射破對手大門，而守將賴恩泰萊或可復出。阿仙奴剛在歐聯晉級8強，士氣大振，法比加斯及艾廸巴約大勇下，要淨勝韋根兩球或以上唔難。