港交所（388）07年發過豬頭，坊間卻盛傳行政總裁阿Paul周文耀做到出年4月底就byebye，噚日阿Paul話會續任一年，即係做到2010年4月，之後先至享受退休生活。
之所以做多一年，主要係港交所07至09年度策略性研究報告出年年底先完成，好頭好尾跟埋先走，加上董事會成立嘅獵頭委員會，物色繼任人程序起碼要一年，所以佢先至留低，但決不例外喎。咁點解一定要退休？佢話，年紀大嘛，今年已經61歲，過咗法定退休年齡60歲。
阿Paul強調，港交所係集體領導，一個人嘅去留唔會影響運作。佢仲爆料話，嚟緊都有幾位高層會退休，佢會幫手搞掂交接工作。華華睇番港交所06年報，下一個最大機會退休嘅人，似乎係結算科主管盛善祥，因為佢舊年都芳齡59嘞，當然董事會可以酌情續約。
港交所舊年賺61.69億銀，多過市場預期，派出嘅花紅去到2.54億銀，比舊年多1.41億銀！平均每位員工有6.6個月花紅！本身已經係億萬富翁嘅周董，07年嘅bonus按年升倍幾至581.4萬銀，除番底薪734.4萬銀，即係9.5個月花紅噃。周董07年總人工升23.58%至1518.2萬銀，佢喺期內行使購股權，用8.28蚊換咗122萬股，以每股末期息3.4蚊計，呢批股收息都414.8萬。