唔知呢排係咪因為油價高企，所以搞到啲細車同嗰啲以環保慳油掛帥嘅車款都賣多咗好多，幾乎每有新車登場，就即刻引到班用家走去睇車落Order，都咪話唔厲害。其實有架未到港嘅新車，都有好多Fans喺度好畀心機咁等，希望佢一嚟到就即刻可以做車主，揸佢出街周圍兜威吓咁話。係乜車咁巴閉？咪就係消失於車壇多年、早前終再現身嘅Fiat500囉！
之前有傳言話呢部意大利經典城市小車，喺新一代型號推出無耐之後就會嚟到香港，而且仲曾經傳出唔少汽車代理集團，為咗可以做到呢位萬人迷嘅代理，各自使出唔同招數同廠方密密斟咁話。另外最近仲有傳言，話有車行已經引入咗一部左軚版嘅Fiat500嚟香港㖭！正當我車報員聽過晒呢啲傳言，搞到都唔知信邊個好之際，日前就收到線人報料，話Fiat500喺香港銷售工作，將會由家陣代理AlfaRomeo嘅AutoSportiva負責。雖然新車嘅訂價到呢一刻都仲未Confirm，不過就話已經開始收緊Order，兼且部車有望喺年中嚟到香港㖭！咦，如果你同我一樣，都係Fiat500嘅Fans的話，咁就要快手打個電話去AutoSportiva問吓訂車嘅詳情啦。
記者：車報員
查詢：AutoSportiva（28778788）