鍾欣桐（阿嬌）年前被雜誌偷拍後，曾聲淚俱下訴說自已是小朋友偶像，今後不知如何面對小歌迷。日前其過氣情敵鄧麗欣（Stephy）在兒童遊樂場接受本報訪問時，強調自己身為小朋友偶像，一定會檢點行為做好榜樣，言語間似有意揶揄阿嬌。其實Stephy早前就曾以「好儍好天真」來形容自己在新戲的角色，被指揶揄阿嬌的天真論，處處進迫，難道Stephy有意取代阿嬌的小朋友偶像地位？
鄧麗欣（Stephy）早前同時受兩大傳聞困擾，除因曾與陳冠希傳緋聞而捲入淫照事件外，也被屈牽涉風化事件，她日前已透過律師發出嚴正聲明證清白。其實Stephy與淫照當事人的關係頗複雜，她分別與陳冠希及方力申傳過緋聞，而淫照風暴的疑似女主角之一鍾欣桐也與方力申傳過緋聞，Stephy與阿嬌除份屬情敵之外，兩人又同樣以玉女形象發展，無論在事業上和情場上均是競爭對手。
Stephy繼早前宣傳新戲《我的最愛》接受訪問時，妙用天真嬌的天真論指自己在戲中的角色「很儍很天真」後，日前接受本報專訪時，又強調自己是歌迷和小朋友偶像，所以一定要行為檢點做好榜樣，言談間似揶揄阿嬌早年被雜誌偷拍後聲淚俱下哭訴自己是小朋友偶像、以後難以面對小朋友的言論，對過氣情敵可謂咬住唔放。
做好榜樣
「歌迷擔心我有份」
談及發聲明以正視聽，Stephy慨嘆做藝人行為一定要檢點，否則難以做小朋友的好榜樣，她說：「呢一刻我可以講要做好自己，而且形象真係好緊要，以前啲人話Stephy塑造玉女形象，其實我唔係做出嚟要好玉女，只係藝人要檢點行為，因為有歌迷同小朋友都鍾意我，我要做好榜樣，好似自己一向都好少出街，唔敢去玩，我希望做個榜樣畀大家睇，因為今次件事啲歌迷都會擔心我有份，所以要做好啲，其實我性格唔係受保護，我係好獨立、好男仔頭，總之大家唔好覺得我好文靜。」Stephy又直言以往所有對她不利的報道，對比今次兩則傳聞可謂是小巫見大巫，過往的新聞現在對她來說只是「濕濕碎」，雖然她不便評論淫照事件是否帶出藝人虛偽的一面，但她覺得不可以因此抹煞其他藝人的努力。
在淫照和風化事件兩則傳聞中，Stephy對風化事件的反應不及淫照大，她說：「嗰單新聞自己冇乜感覺，雖然係幾傷害同侮辱，但真係太假，反而淫照之前話有多幾個女星，我有啲擔心，因為啲相可能永遠流唔到出嚟，啲人就會估係邊個，咁就會變咗沒完沒了，好似更加講唔清囉，不過我都唔想再講再提，等件事慢慢淡化。」
嘆風氣差
「網上流言冇人管」
Stephy續說：「我冇因為新聞而後悔入行，因為已經比我預料嘅好，入行前啲人話娛樂圈係大染缸，好複雜，但經歷咗咁多年，我唔覺得囉，而且地方係人整出來，最重要係個人點啫，我就唔覺得自己有變到。」
不過Stephy也承認不利傳聞的確困擾到她身邊的親友，又以「恐怖」來形容在網上散佈流言的造謠者，她說：「呢個風氣真係幾恐怖，大話講幾次就好似變成真話，傳聞講得多大家都會信，網上流言冇人管，任何人都可以登入留言，對藝人好唔公平，我哋亦好難避，我覺得係有班人刻意中傷同抹黑啲藝人，都唔知用意係乜，我之前一路覺得清者自清，但係我媽咪同朋友都有俾人問，好似我朋友都俾人話『你朋友真係慘』，我怕影響到佢哋，所以先出聲明，𠵱家我覺得聲明已足夠，唔需要發毒誓。」
採訪：駱華齡 攝影：陳順禎
髮型：VincePang@ILColpo
話你知：天真嬌vs玉女Stephy
鄧麗欣和鍾欣桐出道以來均走清純玉女路線，恰巧兩人也曾與陳冠希和方力申傳過緋聞。
鍾欣桐
年齡：27歲
學歷：中五畢業、澳洲墨爾本皇家理工大學（未畢業）
形象：天真無邪
兒童電影作品：曾為《小飛俠2004》配音
兒歌：推出《SingingintheTwinsWonderland》系列兒歌唱片
鄧麗欣
年齡：24歲
學歷：中學畢業、香港專業教育學院時裝設計系
形象：清純才女
兒童電影作品：曾為《踢躂小企鵝》及《反斗仙履奇緣》配音
兒歌：曾錄影tvbQ節目「小Teen地熱辣辣兒歌演唱會」
資料來源：《蘋果》資料室
娛樂資料庫：愧對兒童聲淚俱下
鍾欣桐曾自詡是小朋友偶像，06年8月雜誌《壹本便利》刊登了她在馬來西亞雲頂登台時，在後台更衣時的露胸圍帶側面照片，鍾其後每次現身都哭得雙眼紅腫。
事件發生後翌日，阿嬌即出席在無綫舉行的聲討大會接受訪問，其間更中斷訪問拭淚，她當時指偷拍照片是一件醜事，令她留下陰影，當日約有300名演藝界人士到場支持她，聲討本港傳媒界偷拍藝人私隱的不良風氣，阿嬌在節目上發言時激動落淚說：「我哋係好多小朋友嘅偶像，呢件事好影響我哋嘅image（形象）。如果我見到小朋友，我都唔知點樣去面對佢哋。」
