R8纖毫畢現　微距最掂

𠵱家數碼相機多到一街都係，但係人人都希望揀番部最滿意嘅，越高像素越好，遠、近、廣角拍攝都要掂，仲要個芒夠大夠靚。嘩！揀老婆咩，邊度有咁完美嘅機呀！除非，你係講緊RICOHR8，佢有1cm微距拍攝、28mm廣角拍攝及擁有2.7吋46萬像素HVGA高清芒，試完之後，佢完全成為筆者心目中嘅「女神」，接近完美嘅數碼相機。

記者：洪偉順
攝影：陳盛臣
Model：Tracy

微距拍攝，可見指甲咁大的花仔，最後連花芯都拍到。

超微距勁過放大鏡

影相嘅時候，太遠嘅可以行近啲影，但係細到毛髮咁嘅物件，你一係「隊」到好近但部機Focus唔到，一係就要換部單反機配「大炮」。RICOH一早出過1cm微距的卡片機，當年已令筆者驚喜萬分，時移世易配合1,000萬像素的提升及鏡片的改良，呢項微距功能更加發揮到極致。筆者貪玩用R8影同事臉上的暗瘡，細微到連皮膚紋理及肉眼難以查覺的面毛都拍得一清二楚，在場人士無不嘆為觀止。乜解究咁細緻？睇真啲RICOH提供的數據，原來鏡頭落重料：14片鏡片之中有2片ED玻璃鏡片，3片超高屈折率玻璃鏡片同4片非球面鏡片，唔怪得之在測試中連手指甲咁大的花朵中之花芯都影得一清二楚，好似鏡頭前加裝放大鏡。

千萬像素28mm廣角

講真，RICOH一向憑GR系響朵，潮人大軍人手一部；另一爆紅作，則是市場上首部推出28mm的卡片機。雖然近期已經被「後浪」趕上達至25mm超廣角，不過28mm配1,000萬像素在市場上仍算少見，以後旅行影山影水或者一大班人影群體相，就唔會少一忽！RICOH梗知自己優勢，R8亦將GRII同GX100兩大潮機的1:1四方形比例相片功能移植過來。此外，卡片機勁Hit的面孔識別已經玩到天花龍鳳，R8亦追到貼玩埋一份，在預設拍攝中更加有黑白及棕色、斜度修正等簡易模式。

■1:1四方形相片，大玩懷舊120菲林Feel。

■有人面對焦、黑白相片及斜度修正等模式。

■可固定最小光圈拍攝，景深大有Mood啲。

靚芒直接改相

R8係第一部有HVGALCD芒嘅DC機，2.7吋LCD芒夠晒大，再加上46萬像素高清質素，咁靚嘅LCD芒通常要去到1至2萬價位的單反機先有。睇相方面，R8可以直接用SlideShow睇番，更User-Friendly的設計，係用家可以在相片預覽模式中直接對相片作出修改，例如作90度或180度旋轉、減低像素、直接裁相、白平衡補償及斜度修正等，真係連拖入電腦用Photoshop的時間都慳番。