現年19歲嘅梁洛施（Isabella），年紀輕輕嘅佢年前已憑主演電影《伊莎貝拉》榮膺葡萄牙影后，仲開始踏足荷李活市場，本來佢前途無限，但佢近排突然曝光率劇減，連所屬嘅英皇娛樂舉行春茗都缺席，原來係因為佢搵到位超級富豪男友做靠山，唔怪得之佢會唔憂做。
轉電話玩失蹤
噚日有傳Isabella同英皇玩對抗，轉電話號碼兼成日失蹤，連公司中人都搵佢唔到，佢之所以夠膽咁做，其實係因為同一名超級富豪秘密拍拖半年，呢位富豪雖然比佢年長十幾廿年，但佢哋依然傾得埋，而且富豪好錫Isabella，甘願為佢開出贖身支票，等佢同英皇解約，回復自由身，據聞佢同英皇仲係為解約事宜拉鋸中。
Isabella13歲入行，當時簽約15年，所以有排都未約滿，但Isabella生性倔強，之前佢因為同助手不和、對公司又唔合作，因而被雪藏，從呢件事上都睇到佢幾有性格，同公司關係亦都麻麻，𠵱家佢泊到個大碼頭，聽聞Isabella母女最近仲由碧瑤灣搬去貝沙灣，出入有保鑣護航，排場絕唔嘢少。
Mani拒回應
至於Isabella嘅男友係邊個呢？有傳呢位富豪係小小超李澤楷，噚日馮仁昭都有打電話小小超求證，但未獲回覆。
對於有報道指梁洛施有富貴男友代為贖身，與經理人公司玩失蹤，英皇經理人霍汶希（Mani）話：「唔回應。」現階段尚可聯絡到梁洛施嗎？Mani依然話：「都係唔回應啦。」
