湯盈盈同曾偉權噚日喺九龍城碼頭，拍無綫劇集「師奶股神」嘅跳海戲，劇情講到盈盈想跳海自殺，曾偉權好努力咁阻止，不過盈盈都係跳咗落海，曾偉權就跳埋落海救佢。
自揭肚腩咇水柱
盈盈未跳海就已經好興奮，因為未試過喎，佢都一早做足晒準備工夫，着咗泳衣同包晒保鮮紙，不過佢跳完之後就大喊：「啲保鮮紙都冇用嘅，入晒水。」佢仲揭起件衫畀記者睇，個肚臍位仲無端端射咗條小水柱出嚟，引到全場大笑。
曾偉權自身難保
噚日個海面都幾污糟，連衞生巾都有，所以盈盈跳海前就不斷大嗌：「有冇人幫手撈咗條姨媽巾呀。」當兩個人都跳晒落海時，話就話曾偉權救盈盈，不過眼見曾偉權唔係好夠氣之外，仲好似要盈盈救番佢轉頭，盈盈喺海度都忍唔住大叫：「乜唔係你救我咩，點解你淨係自己游嘅。」上水嘅時候曾偉權話：「我冇氣呀，可唔可以拉我上水先呀。」事後曾偉權話：「落到水之後凍到成個人僵晒，郁都郁唔到，真係似盈盈救我多啲。」