萬科集團主席王石鍾意攀山遊歷，又鍾意影相，不時將遊山玩水嘅相放上博客任人睇，吸引唔少網友留言回應，最近一個叫西山南風嘅網友，拋低兩個問題畀王董，不過唔知係咪華華敏感，覺得啲問題帶有少少火藥味。
西山南風問：「身為上市企業董事長那有那麼多時間遊山玩水？不能多用些精力時間在萬科的經營管理上嗎？」王石點招架呢？佢先聲明：「上世紀1999年，老王辭去了總經理職務，只任董事長一職。」言下之意，管理嘅嘢一早交畀其他人做，唔關佢事。跟住話，一個好嘅董事長，最大責任係喺企業戰略上畀大方向，而下屬可以勝任嘅事，就最好交畀下屬做咁話。而呢番理論，係睇馬克吐溫嘅名著《湯姆歷險記》學到嘅。
要團隊甘心賣力講技巧
王石嘅回應引咗《湯姆歷險記》其中一段，話頑皮仔湯姆俾人罰清潔欄杆，湯姆仔不情不願，於是佢一副好好玩、好投入嘅樣喺度清潔，引到其他小朋友以為好過癮，爭住幫佢做。王石嘅意思係，只要做董事長嘅識得好似湯姆仔咁，令團隊甘心為你賣力，包括畀到好前景同保障啲員工，咁董事長去遊山定玩水，網友就睇開啲啦。