揚言感情生活空白的佘詩曼，近日終於情歸新寵「BB」，原來近日她飼養了一頭3個月大的蘇格蘭摺耳貓，一人一貓不時孖咇黐到實。日前阿佘到火炭拍攝體檢及醫學診斷中心廣告，竟湊埋BB開工，每有空檔即攬着牠玩一餐，癡纏到暈。
佘詩曼日前到位於火炭的一幢工業中心，為香港體檢及醫學診斷中心拍攝新一輯廣告，今次是她第二年擔任代言人，廣告商更特別送她一張鑽石卡，讓她終身免費做身體檢查。
爬上爬落百厭
當日心情勁靚的阿佘身穿白長褸配黑長褲，手持「大聲公」拍攝，狀甚神氣，但原來令她開心的原因，除了賺取廣告酬勞外，也因其新寵「BB」在場探班。其實BB是一頭3個月大的蘇格蘭摺耳貓女，阿佘自從飼養牠後已變得很深閨，經常留在家中玩貓，就連其手機也上載了BB的靚相做wallpaper，可見BB甚得她歡心。
大多貓主都愛將貓隻放在家中，以免牠走失，不過阿佘和BB已建立深厚感情，當日她更冇有怕，帶BB首次出街，難怪BB心情極度興奮，在影樓不停爬上爬落，十分百厭，逗得阿佘笑不攏嘴，每有空檔即抱着BB玩。
「佢係我情人」
阿佘笑說：「今次係我第一次養寵物，養咗之後我都少咗出街，因為擔心得佢一個喺屋企，佢仲係我情人嚟㗎。其實我鍾意狗多啲，但要成日放狗，所以嘗試養貓，我喺寵物店見到覺得好合眼緣，貓女真係好黐人。」
採訪、攝影：林妃