女人眼中，支支玩具槍差唔多樣，擺到成屋都係，都唔明點解要買咁多支。男友極速帶點抱怨地還擊一句：「我夠覺得你對對鞋、個個名牌袋一樣咯，你又買極都唔厭？」吖！……呢一刻有隻烏鴉喺我頭上飛過，冇得反抗。男人愛槍，我估應該由3歲時一套警察玩具開始。呢份情意結越大越結得深，一旦爆發，燒銀紙的速度，比起女人換名牌其實差不多啫。
攝影：梁細權
http://appleblogpaper.blogspot.com
aboutme:
fluffy
周圍逛、周圍蕩是我的嗜好。從來不怕人生苦短，只怕成世人流流長兩腳一伸，沒任何值得回憶的畫面，一直堅守嘆盡、嚐盡、玩盡這人生三大目標。一世勞碌只為銀行的幾個數字才是大笨蛋，寧花盡一分一毫，也不願使剩半角三仙入棺材。
入門買至平國產貨
男友好畀面，每次帶妾侍返屋企，都總邀請我監場。就算十萬個不願意，都要投其所好以保正室之位。起初扮興奮，確實唔明點解要用幾千蚊買嚿鐵返屋企摸。陪足10年，由冇興趣極都開始對玩具槍略有點了解，周不時仲扮吓專家指教身邊朋友。早兩日我先踩停Cici，因為佢正打算落旺角買支黑色長槍M4送畀男友Steven，大概$900左右。我立刻大叫：「咁平？M4，我男友都有3支，但品質較有保證的是香港出品，如G&P都起碼要$1,500。」近年，雖然大部份手槍都係中國製，但一樣有分香港、台灣同中國品牌。價錢大概平一半左右的國產牌，雖然同樣全金屬槍身，但手工粗糙，組件尺寸準確性冇保障，不但影響日後改裝加工，更引致唔夠密氣的情況，減低發射力度。支槍有咩三長兩短，慘到連保養都冇。以平日腌尖講質素的Steven來講，Cici的$900必定白白浪費而不討好。不過，我男友Roger就成日話：「湊熱鬧學人買槍玩嘅男仔大把，新手買支試吓係咪真係鍾意玩，國產牌的確係最好嘅選擇。」
軍事戰場配件強化像真度
見Cici騰晒雞怕男友失望，我呢個半桶水都唔敢隨意盲公指路，帶Cici上Roger屋企朝拜問功課就最穩陣。我見佢平日都鍾意上討論區答人問題，Cici送上門，專家癮即發：「早10年，日本設計的確最勁，只可惜日本法例規定槍身只可以用膠。所以槍身重量同手感雖然仿真度已經好高，但始終不及全金屬手感。台灣同香港近年抄足日本槍嘅發射組件，但用金屬做槍身，質素一啲都唔差，價錢又平一半，搞到大把日本仔組團嚟香港買。」
Cici見到Roger一大堆的妾侍，長長短短加埋20支，忍唔住大叫：「呢度加埋幾錢？點解你支M4靚咁多？」Roger望一望我，靦腆一笑：「嘩！唔好講啦！十萬？唔止啦！我支M4加咗真係戰場用嘅EOTech瞄準器、SureFire電筒、Knight魚骨等等，再連埋改槍柄、彈弓等改裝，淨係呢支都要一萬蚊。好多槍友希望像真度高，都會加呢啲軍事用配件落去。以往買啲同發射冇關嘅軍事配件好容易，因為美國大把網站有得賣。不過911之後，全部一律禁止出口，市面上賣緊嘅都係靠某幾間大代理商向領事館攞批文，所以價錢貴好多。我知道有其他人會專登過泰國買，更有朋友試過喺美國買咗帶返香港，畀海關搜到，當場揼碎晒先畀番佢。其實玩槍啫，要犯法都無謂冒險啦。」
夜視鏡未捨得買
通常喜歡槍都係由玩WarGame而起，走入戰場，得支光頭槍又點作戰呢。加配件輔助方便攻擊、改槍增強力度（香港法例規定不得超過2焦耳），再計埋軍服、對講機、彈夾等，Cici開始為男友呢個無底深潭新玩意而感到焦慮。Roger踩多腳：「我算買得少喇！2萬幾蚊起嘅PVS14夜視鏡，我都未捨得買。有發燒友直情買支日本槍返嚟，淨係留番個膽，成支槍改裝晒金屬殼。每件配件嘅手工錢都要$150至$500，全支逐Part改，價錢仲誇張。日日上網追住現役美軍用咩牌子、有咩新嘢，又即刻睇吓玩具有冇出。美軍換嘢試分分鐘快過你哋女人換手袋呀！
「不過想慳番啲，就可以落啲心機上網睇吓，外觀上嘅『裝裱』其實簡單。夠膽嘅，買支槍返嚟第一步就拆開晒佢，要學改槍，第一步就係要識拆槍。新手必定使好多寃枉錢，因為分唔到邊個牌子好，玩得耐，自然就識得分。開頭最好買啲大牌玩吓，就最穩陣。到你有經驗，又唔一定支支槍都追牌子。好似我支DreamGun就係AK47，一直唔買就係因為日本出得太靚。要似真嘅AK47，一定要夠Raw，保留原有嘅粗糙味道，所以國產貨係最好嘅選擇。」滔滔不絕嘅儲槍理論，兩個女人理解而不感興奮。我哋只會銘記呢個不相伯仲的燒銀紙玩意，必定係Shopping掃貨的強力藉口。
查詢：名鎗店（27812828）
旺角廣華街30號地舖
最新回應
Terry：之前打WarGame都買過兩支槍，但香港地方細，約人打又煩，後來都冇打。買咁多槍，真係燒銀紙咩。
Nelson：我打過幾次WarGame，雖然好鍾意玩，但真係唔敢買槍。怕買第一支之後，會跌入個無底深潭，好嘥錢。
相關超連結
http://www.civiliangunner.com/
網上關於玩具槍的網頁多得恐怖，最受玩具槍迷歡迎的有這個CivilianGunner。全因內容十分齊全，包括所有槍械軍服介紹、新手入門、打仗手勢等，足夠槍迷有排進修。
http://www.wargameyau.net/
討論區同樣多的是，這個最多槍迷瀏覽的戰野友討論區，有不少專家會為你解答難題，等你唔使下下山長水遠落廣華街問人咁浪費時間。
