剛完成個人演唱會，以及剪了一個新髮型的唱作歌手林一峰，前晚應邀出席《蘋果》網站直播節目《娛樂開CHAT》。當主持人懷鈺問到林一峰個腦到底盛載甚麼時，他竟衝口而出的說：「我個腦好變態。」平時面對壓力，他表示會與朋友飲酒和做運動減壓。
問到與早前邀請出席演出的好友何韻詩、謝安琪、鄭融和李宗盛相處的趣事？林一峰大爆與鄭融在英國一起買鞋時，對方為了美觀刻意買大幾個碼的趣事。林一峰更應讀者要求點唱，有求必應，演繹了他的偶像陳百強的經典情歌《深愛著你》，最後又發揮音樂才華，為《娛樂開CHAT》節目作了主題曲。大家可登入《蘋果》網站 http://ent.appledaily.com隨時重溫節目。
採訪：林惠卿、懷鈺 攝影：林德雄
新髮型被嘲栗頭 紅磡肥羊
肥羊：有一個大家喺聊天室好關注嘅問題想問你，係關於你嘅新髮型，今日見到你個新髮型都幾surprise，大家都覺得你呢個髮型好似卡通人物，好似《IQ博士》入面同你一樣好有愛心嘅一個人。
林一峰：栗頭老師，個髮型可能有啲似，但頭型就唔似，佢個頭大過個身，我幾卡通都好，個頭都唔會大過個身。我幾鍾意呢個髮型喎，畀你摸吓喇！你滿唔滿意呢個髮型呀？不過你唔滿意都冇用，因為個頭係我嘅。
唱《紅河村》易落淚 將軍澳Oliver
Oliver：我想問你喺自己嘅作品裏面，有邊首歌係你一唱live就會覺得好夭心夭肺，但又好想唱㗎？
林一峰：哇，你呢個問題好毒喎！《紅河村》，我最想唱同埋最要駕馭嘅感情係《紅河村》，呢首歌係講我自己嘅成長。有一個好特別嘅情意結係屬於香港人嘅，我係由自己長大的地方出發，跟住大個做嘢，有能力離開香港，喺機場搭飛機望番落香港，嗰啲咁嘅成長經歷。我哋就算唔記得「唱遊堂」裏面唱嘅《紅河村》，都會記得周慧敏喺《大時代》裏面唱嘅《紅河村》，有好多香港人的集體回憶喺裏面，包括我自己嘅感情都喺裏面，所以呢首歌我現場唱係會幾危險㗎，會有少少夭到我喊㗎。
主持：Oliver，你有冇乜嘢歌想聽，可以𠵱家點唱。
Oliver：咁不如就唱《紅河村》啦！
林一峰：你咁毒嘅，不過𠵱家日光日白，唔會有嘢嘅。（現場獻唱）
美國探兩契女 紅磡小夜
小夜：你今年咁多搞作，預計今年仲有幾多時間去旅行？
林一峰：我今年會當第二次中國巡迴演唱會係一個旅行，同埋我將會去美國探我契女。我喺美國有兩個契女，佢哋𠵱家有一個已經兩歲，另一個得半歲，希望今年暑假可以去睇吓佢哋。
話你知：李宗盛贈特製結他
林一峰的賣點是自彈自唱的唱作才華，他身邊隨時都有個結他陪伴左右，前晚帶在身邊的好拍檔是由李宗盛送的木結他，林一峰說：「呢個結他係大哥（李宗盛）舊年5月送畀我嘅禮物，佢特別幫我挑選木材，然後親自設計，再交由佢喺天津嘅結他廠為我度身訂做，全球只得一個，獨一無二，係無價寶，結他裏邊仲刻咗佢個名。」
問到林一峰這個結他有何特色？他說：「大哥話好秀氣，所以送畀我喎！」林一峰表示家中共有七個結他，每個都別有特色，而由李宗盛所送的暫時最得寵，幾乎天天帶在身旁，他說：「我帶過佢去過好多地方演出，佢去過加拿大、美國同陪我唱過中國巡迴㗎！」
