馮德倫與張雨綺這對緋聞男女昨日出席時裝活動，馮德倫大讚張雨綺演戲非常好，不過她年紀太小，未知會否接受他。此外，對於陳冠希主演的《跳出去》，他重申未有收到指令刪去他的戲份。
馮德倫與黎姿昨日以嘉賓身份現身中環，出席英國品牌Mulberry的時裝活動，而因參與馮執導的新片《跳出去》的張雨綺則與古天樂齊齊以模特兒身份行騷，張雨綺表現生硬，顯得十分怯場。
與莫文蔚做好友
馮德倫透露今日將會到上海，因為早前與舊女友莫文蔚合作的短片將會首播，問到他會否默契再加分，有機會復合？他說：「做番好朋友，默契都一樣，角色啱佢先搵佢。」問到他會不會因此加分？馮德倫表示：「呢件事純粹係工作，與私人事無關，會保持住呢個關係。」
未收指示刪戲份
馮德倫拍攝《跳出去》時，與片中女主角張雨綺傳出緋聞，問他二人會否有機會？馮德倫說：「Kitty（張雨綺）？會唔會年紀輕咗小小，佢得10幾歲。」記者即告知小小超李澤楷近日與年輕20多年的梁洛施傳緋聞，他說：「冇聽過呢件事，我搵佢一路拍戲為工作，冇認識佢私人，人哋吼唔吼我？我都唔會介意年紀，係睇個人可唔可以溝通，有時工作有默契唔等於可拍拖。」
此外，對於有傳馮德倫將會保留陳冠希（Edison）在《跳》片中的戲份，他表示：「係拍晒，本來係5月上，𠵱家延遲到10月上，因為Edison係一定有影響，對我嚟講係多咗時間做後期，至於會唔會刪減Edison的戲，我唔知，要睇好多個party，哥倫比亞方面同周生（周星馳）方面，我就未收到order要cut佢啲戲。」
採訪：羅慧敏 攝影：林德雄
