講起德國英國用特務滲透列支敦士登皇室銀行LGT，賄賂僱員爆料，於是展開一場歐美澳紐嘅追稅風暴，令各國私人銀行家不得安寧一事，財務F話：「教客戶到列支敦士登開戶口，係私人銀行嘅標準產品，銀行稅務顧問會教客戶將啲錢存入列支敦士登銀行，開一家公司，再到西薩摩亞成立另一公司，再到英屬處女島（BVI）開公司，BVI公司就控制不同國家地區嘅投資公司，咁嘅方法可以話層層保護，重重關卡，可以避開好多重稅，特別係資本增值稅與遺產稅，令各國政府冇符。現在德國佬費事逐間公司查，一棍就扑落源頭，要擁有列支敦士登戶口及公司嘅富豪解釋。從偵查角度講，確係高招。但從私人銀行角度睇，簡直係大災難，以後唔見好多生意，損失一時難以估計。」
私人銀行家素來好風光，食好着好薪水好，日夕與富豪為伍，自視甚高，但客戶有難，私人銀行家份工就朝不保夕咯。財務F話根本未有「銀行無間道」出現之前，私人銀行家今年已備受壓力，主因係○八年頭兩個月嘅投資氣氛好曳，股市係咁跌，去年好賺錢嘅產品Accumulator（別號Ikillyoulater）碰上股市下滑，唔少富翁損失慘重，唔肯畀新生意（即係話銀行產品滯銷），故此不少私人銀行嘅YearToDate生意額與去年同期比較，相差好遠，一啲表現不如理想嘅私人銀行RM（RelationshipManager）已在農曆年後嚐到魷魚香味，假如A股，杜指與恒指繼續係有波幅冇升幅嘅話，私人銀行生意更難以維持。
點解唔教客戶投資商品期貨呢？財務F話呢類投資係高風險產品，對好多客戶都唔適合，而且並非賺梗，好似小麥期貨咁，最近大升大跌，喺二月二十五日大升20%，二月二十七日交易時段三分鐘內跌逾10%，跟住升番20%，一間歷史悠久嘅商品期貨經紀MFGlobal因一位交易員越權沽空小麥令公司損失一億四千一百五十萬美元，私人投資承受唔起呢啲風險也。聽財務F講完，領會到私人銀行如果生意不振，中環甲級寫字樓啲租金就難以維持升勢咯。