美國NBA休斯敦火箭隊核心球員姚明（圖），原來除咗識為球隊灌籃攞分之外，估唔到仲可以幫到佢班主LeslieAlexander，喺股票市場賺錢㖭！負責為Leslie搵投資項目嘅美國火箭資本投資董事總經理黃健華話，佢哋能夠成為中鐵（390）基礎投資者，都係全靠姚明！
黃健華講，舊年底嘅熱爆新股中鐵，原本有成60幾個機構投資者，爭做中鐵上市前9名基礎投資者之一，佢哋可以脫穎而出，除咗因為佢哋有豐富投資經驗外，仲因為佢哋擁有俾美國人叫「移動長城」嘅姚明，皆因咁啱中鐵班老總都喺佢嘅粉絲！
黃生仲話，當佢哋知道中鐵班老總咁鍾意姚明之後，即刻整咗批親筆簽名球衣送畀佢哋㖭！舊年火箭用每股5.78蚊，認購大約5190萬股中鐵，按噚日收市8.92蚊計，即係話淨係「撻朵」就賺咗1.63億銀！睇嚟姚明應該改名做「移動金礦」嘞！