何超儀前晚開騷請來大班嘉賓助陣，但她直言最愛老公陳子聰的樂隊24味，其夫也叫觀眾為他老婆鼓掌，盡晒恩愛。不過子聰不聽老婆指示，在台上講粗口，超儀護夫心切，竟笑指子聰中文不好，不懂所說粗口的意思。
何超儀前晚在九展StarHall舉行「GlamTrashLive」演唱會，請來李璨琛捽碟、黃貫中、張繼聰、農夫及其夫陳子聰的樂隊24味任表演嘉賓。超儀戴bob頭假髮，身穿蝙蝠俠造型的短裙，唱歌時十分狂野，又跳又踢腿兼瞓地，還唱到掟咪座，撞倒旁邊的燈，她說：「有冇好失儀呀？我呢個concert叫GlamTrash，即係金漆演唱會，我外金內漆，冇講粗口呀，我luckynumber係7。」
派T恤唔唱歌
當超儀唱《何家淑女》時，她說：「呢首歌我入行時唱，嗰陣唱到走音，公司叫我唔好唱，當時我好hurt，我好鍾意唱歌，所以冇放棄。」其後她請農夫出場合唱，超儀下台換衫時對農夫說：「唔好講粗口呀！」
超儀介紹陳子聰的24味出場時肉緊地說：「今晚好多我鍾意嘅樂隊，我最鍾意呢隊，24味。」但陳子聰出場很少唱歌，只負責搞氣氛，派T恤派到落台，返回台上時宣佈T恤已派光，旁邊的隊員指着他說：「要唔要佢呀？邊個想要佢，佢好難養呀。」觀眾紛紛舉手，陳子聰卻爆粗罵隊友：「我X你呀。」觀眾聞言表現興奮，但現場不乏18歲以下觀眾，此時台上有聲音以粗口大叫：「你哋好X正呀。」陳子聰返入後台前，特地向觀眾說：「你哋要畀多啲掌聲我老婆，我個老婆呀。」
high得滯失控
超儀事後聞得有指其夫只搞氣氛很少唱歌，她說：「佢係氣氛王，我哋兩公婆都係。」陳子聰要觀眾為老婆鼓掌，超儀笑說：「好開心，平時好收埋㗎，佢唔鍾意攞出嚟講，喺屋企先會講冧說話，出街扮cool。」但她老公不聽話講粗口，超儀笑說：「係咩？佢冇呀。佢可能中文程度唔係咁好，唔明點解㗎，佢哋high得滯控制唔到。」談到現場有未成年人，超儀說：「人哋樣細咋嘛？我哋冇意圖教人講粗口。」
採訪：胡比
攝影：陳偉權
觀眾少靠星撐場
何超儀前晚在可容納3,000觀眾的StarHall開騷，因為她以搖滾為主，故前排為貴價企位，後排則是平價座位，但因只吸引約700觀眾入場，以致場館看來稍為疏落。但捧場的圈內人眾多，包括陳奕迅、蘇永康、梁漢文、劉浩龍及范曉萱等。眾人看得十分興奮，不過安哥時，觀眾已走了三分二。
超儀對此說：「可能我捽得佢哋唔夠高興，今日係愛心演唱會，好多朋友嚟咗，徐濠縈仲日日煲湯我飲，因為我試過唱到聲爛。」至於觀眾人數少又疏落，她說：「我喺台前見到，心諗點解咁？冇法啦，啲飛分價錢，我想叫佢哋逼近啲，我想插水，但前面係自己朋友，怕啲女仔接唔住我。」
