講起辭任退休，華華今日見到恒生（011）副董事長兼行政總裁柯清輝，諗起佢從大笨象滙豐轉去恒生做大班唔夠三年，公司成績一年好過一年，佢收花紅都收到手軟，而唔經唔覺柯大班已經五十有八，會唔會趁最光榮嘅時刻退下火線呢？
柯大班話，打工仔總有退休嘅日子，自己喺銀行界都做咗35、36年，就算有一日要退休都唔出奇，不過，佢就多番強調，如果真係要退落嚟，一定會同大家講聲先。言下之意，似乎大班仲有排玩喎。
恒生07成績表創紀錄大增52%，達182.42億銀，柯大班可謂功不可沒，咁又會唔會更上一層樓，坐上「主席」之位呢？柯大班好謙咁話，恒生成績好，係佢同一班同事努力工作嘅成果，佢好榮幸同好開心，仲話每次去親bankinghall都見到班同事笑口噬噬，就知大家幾咁自豪係恒生一分子，連佢都唔例外。