都唔知家陣班網球明星係咪中晒「金滿貫魔咒」，最新中招嘅竟然係瑞士「1哥」費達拿！繼澳網賽俾「扮嘢祖」廸祖高域喺準決賽踢出局，禮拜一仲慘，竟然喺杜拜錦標賽俾英國小將梅禮淘汰，3年半以嚟第1次喺參加嘅賽事首圈落馬，睇嚟「費達拿王朝」隨時有崩潰可能！
費達拿首圈下馬失風度
新一年，個個當紅男、女網球手都話要贏晒4大滿貫再加一塊京奧金牌，誰不知比利時「1姐」軒寧就率先脫腳；之後瑞士「1哥」費達拿喺帶病情況下勉強出戰澳網賽，結果準決賽輸俾「扮嘢祖」，又係功敗垂成。大家話嘞，「1哥」同「1姐」係咪中晒「金滿貫魔咒」先？
唞咗一個月之後，「1哥」梗係想重振雄風啦，誰不知又喺禮拜一俾得嗰20歲嘅梅禮以總盤數2:1擊敗，搞到費達拿喺新嘅一年竟然仲未捧起過任何冠軍獎盃，難怪佢賽後竟然有失風度咁話梅禮比賽時唔積極，淨係識得等佢出錯，連進取啲嘅打法都冇。
畀「1哥」咁寸法，後生仔梅禮梗係唔客氣啦，仲揶揄番費達拿話：「唔通叫我同佢鬥攻鬥搶咩？」咁又係呀，對住費達拿真係唔可以急，只能伺機而後動，除非好似「扮嘢祖」下下大力抽擊，打到「1哥」無力招架。不過一個守、一個攻，結果「1哥」都係輸，唔通統領咗網壇5年幾嘅費達拿真係見晒底。
我求大俠捧咗費達拿場好多年，一、兩場失敗其實唔代表啲咩，雖然話近年佢的確有走下坡之勢，但狀態有高有低，只要能夠盡快調整，相信好快「1哥」就可以鞏固番4年以嚟所建立嘅無敵「王朝」。