噚日公益金喺中環滙豐總行舉行「公益綠『識』日」記招，邀請信寫明滙豐（005）亞太區主席鄭海泉係主禮嘉賓之一，點知去到現場，滙豐嘅公關大員話，鄭海泉因為公事，一早飛咗去北京，所以嚟唔到，臨時請嚟身兼公益金籌募委員會聯席主席嘅太古中國主席陳南祿主持大局。究竟啱啱入咗滙豐董事局做執董嘅鄭海泉，有咩公事要咁急北上呢？
「地域」變「利率」
原來佢去咗北京，參加溫家寶總理在場嘅政協經濟、農業界別聯組會議，據《中新社》報道，鄭海泉仲向溫總介紹滙豐喺湖北搞嘅農村貸款試點㖭，講講吓溫總仲打趣咁問佢，要唔要擴大試點？
同場仲有一件搞笑嘢，鄭海泉英文loklok聲，但普通話就肯定差得遠，佢用普通話講「地域」，大家竟然以為佢講緊「利率」，鄭海泉立即話自己普通話唔標準，引嚟哄堂大笑。