蘇聯集團瓦解後，冷戰結束，西方國家啲情報機構冇咗蘇聯KGB呢個對手，若有所失，因為好多反間諜與偷情報任務都唔使繼續執行也，若然唔係多咗阿蓋達呢個恐怖組織，令西方國家大打反恐戰，啲西方特務機構要裁員都似。
德國情報機構BND冇咗蘇聯、東德呢兩個對手之後，唔知係唔係得閒得滯，竟以德國富豪為敵人對象，派出卧底間諜到小國列支敦士登嘅銀行LGT偵查，卒之以四百二十萬歐元賄賂咗一個LGT僱員，從銀行電腦下載咗一千四百名客戶名單資料。有名單在手，德國稅局按圖索驥，嚴查德國富豪，截至二月二十六日，已有一百六十三名德國人承認將資金轉移到列支敦士登，逃避德國稅，被罰五千五百萬歐元稅款，原來英國亦有份參與其事，預期會向英國富豪追回一億鎊稅款。
追稅出到用特務機關，歐洲富豪有難矣。LGT銀行客戶資料已在各高稅國家稅局及情報組織流傳，美國、加拿大、澳洲、紐西蘭、瑞典、意大利、西班牙、荷蘭、愛爾蘭等紛紛追埋一份，邊位富翁、富豪在列支敦士登銀行有戶口嘅，未來幾個月都會瞓唔着覺。列支敦士登係一個好細好細嘅國家，靠低稅制及銀行保密制度以及賣紀念郵票嚟支持國家經濟，𠵱家俾啲大國聯手打壓，根本無力反抗，搞到國不成國。
客戶有事，啲私人銀行家與稅務顧問難免會受到牽連，瑞士啲私人銀行風聲鶴唳，甚至話以後唔敢請德國人，驚住請到個德國間諜也，但難保冇英國、西班牙，甚至亞洲人做銀行無間道啫，當政府以對付恐怖分子嘅方法嚟對付私人銀行與富豪，民營機構根本無力應付。香港稅率低，取消遺產稅之後，富豪避稅嘅動力已經大大減少，相信香港特區政府唔會加入追稅行列啩？至於向德國及英國收賄款而透露機密嘅LGT銀行（列支敦士登皇室擁有）僱員HeinrichKieber已經走咗去澳洲隱姓埋名，但一千四百名銀行客戶之中，不排除內有「惡人」，佢哋受政府罰稅之後，會否派人去澳洲「懲罰無間道」？劇情應該仲未完㗎。