荷李活華裔女星白靈，上月13日即情人節前夕喺洛杉磯機場一間禮品店，涉嫌偷取價值約125港元嘅雜誌同電芯俾警方拘捕。洛杉磯警方經過大半個月嘅調查，噚日正式以高買罪名控告白靈，案件鐵定於美國時間聽日喺洛杉磯開審。目前正喺新墨西哥州拍片嘅白靈獲悉開庭日期後，已經向法院表示自己未能出席，當日會委託律師出庭辯護。
白靈嘅代表律師鄧洪向台灣中央社表示，今次白靈絕冇偷竊意圖，冇畀錢只係因為佢同男友啱啱分手，喺心神恍惚下先順手牽羊。鄧洪又話，今次白靈被告嘅罪名屬於「輕罪」，依照美國法律，最高可以判處6個月有期徒刑、罰款250至1,000美元（約1,946至7,784港元）不等，但一定唔使留案底。
網誌透露心聲
白靈日前知道消息後即時放下心頭大石，噚日仲更新自己個網誌，佢話：「我有個好消息同大家講，檢察官決定唔起訴我偷竊罪。當日我絕對無心犯錯，我有信心會真相大白，因為我從來都冇意圖偷嘢。」白靈仲喺網誌度放咗一張佢圍住浴巾嘅吸煙相，睇嚟佢心情唔差。