今時今日搵男朋友，除咗要出得廳堂，仲要入得廚房。電視烹飪節目主持好多都係男仔嚟，除咗白頭佬歐陽應霽，就係私房菜囍宴老闆Jacky。前幾日去佢度食飯，好味到差啲連條脷都吞埋，尤其桂花熏蛋，除咗用鮑魚XO醬，最正仲有個「溏心蛋」。
溏心蛋即蛋白全熟，但蛋黃呈濃稠流質狀，食落好似溶咗嘅芝士咁。蛋白、蛋黃都係半熟嘅半生熟蛋好易煮，烚3分鐘左右就得，但溏心蛋難得多。Jacky教路，將蛋放入清水開火煮，水滾時熄火，唔好打開蓋，焗10至15分鐘就得，「因為每個爐火喉唔同，試三、四次就掌握到正確焗幾多分鐘。」
佢仲教我熏蛋，先將張錫紙鋪上鑊，然後放桂花等熏料，記得加糖，因焦糖好香，如果喜歡仲可以加咖啡，啲熟蛋要放喺蒸架，最後冚蓋開火熏到入味，佢講笑：「間屋之後會好大味，最好去朋友屋企熏啦！」
逢周一至周四刊出