香港嘅CEO出入坐Benz，喺office坐大班椅，對貧困人士嘅生活知道幾多呢？有個志願機構國際十字路會，喺今個周末主辦名為「SlumSurvivor2008」嘅籌款活動，畀啲機會呢班CEO或者高層，體驗吓貧困人士嘅生活。
參加者來頭唔細，好似國際四大會計師行之一嘅畢馬威中國及香港區主席夏理遜，另外仲有瑞銀、法國巴黎銀行、高盛、麥格理、香港金域假日酒店嘅高級行政人員。
個活動舊年3月份都有搞，當日證監會行政總裁韋奕禮有份參加，佢要用真實貧民窟用嚟搭屋嘅材料，親手起自己個貧民窟，食簡單食物，韋奕禮提到上年嘅體驗，話喺活動上同一班財經界高層討論咗好多關注貧困國家居民嘅嘢，令佢反思點樣幫佢哋。
至於今年，呢班大企業高層會入住主辦單位設喺青山公路嘅「CrossroadsVillage」，即係香港黃金海岸隔籬，其間會安排一啲現實中貧困國家遇到嘅不平等待遇，等班高層要員親身感受吓俾人「恰」嘅難民式生活。參加者要搵親朋戚友贊助善款，佢哋先可以入camp住番大約24個鐘頭左右。