華華噚日收到中銀香港（2388）嘅通告，話副總裁陳子政（TC）辭任。TC坐呢個位只係今年1月初嘅事，凳都未坐暖就唔做？原來TC係以健康理由辭任。
TC孭住中銀香港副總裁呢個銜頭出場嘅次數唔多，其中一次係慶祝中銀人壽十周年酒會。華華打聽到，TC自農曆新年開始已經請病假，聽講飛咗去新西蘭休養，而且需要長期休養同治療，所以佢會陸續辭埋其他公職。
TC履新中銀香港前，華華曾經喺公益金服飾日嘅儀式上見過佢，當時佢一身夏老威，佢話同家人去咗夏威夷度假，成個人叉完電精神奕奕。TC人緣好好，深得下屬歡心，相信識佢嘅人都同華華一樣，希望佢早日康復。
TC之前喺花旗集團做咗27年，舊年5月退休前係花旗香港一哥，又兼埋大中華區企業及投資銀行總裁一職，退休後被中銀香港羅致做副總裁，呢個職位係中銀香港新設嘅，主要想搵人睇晒中銀香港金融市場業務，包括全球市場部、投資及保險產品等，無非都係想發展非利息業務嘅收益，呢啲業務，TC絕對係不二之選。
做慣一哥唔怕做副手
雖則由一哥變做副手，仲係五個副手之中嘅一個，但做咗咁多年賓架，正如佢話齋：「錢或者係咪一哥，已經唔係最重要考慮。」佢履新之前，華華幾次見佢，都覺得佢躊躇滿志，對新工作好有期待。
至於TC辭任之後，中銀香港就要另覓人才，佢哋份通告講明，會重新召開由獨立非執董馮國經牽頭嘅招聘委員會，同上次一樣會公開及全球招聘。至於TC原有職務，暫時會由其他高層頂住先。
電郵：mailto:[email protected]