現今科技發達，由短變長、細變大、冇變有只屬小兒科，女士們整容、駁假、黐假眼睫毛等等，已變成潮流日常玩意，不再收收埋埋之餘，仲會大方話你知：「假㗎！靚唔靚呀？」真實例子有：以往去Salon駁髮係星級享受，價錢相當昂貴，不過家陣駁髮普及且潮興幾年，行出街10個女仔7個都有駁髮經驗。市面上駁髮方法不同，價錢豐儉由人，以下介紹3款，邊款啱你？
記者：陳諾堯
攝影：梁細權
Models：Marie@Calcarrie's、Celia@StageModels、Sara
場地：i-chihair
最貴：HairPiece成幅駁
HairPiece駁髮係最唔傷頭髮、最自然兼最貴的一種。不過物有所值，收得貴當然有原因，與其他駁髮技巧不同，HairPiece駁髮由髮根開始成幅駁，看來較自然，而且不易暴露駁髮真相，真正駁咗都無人知！
1.先選好與自己髮色相近的HairPiece。
2.然後分Sessions開始貼住髮根位置擯辮子。
3.預備針線駁髮，真係用針㗎！但完全唔痛，放心。
4.最後將量度好的HairPiece，以針線縫於辮子之上，程序就好似平日補衫一樣，好Easy！
駁2-3層約$4,500
最傷頭髮：熔膠駁髮
熔膠駁髮係將駁髮束與真髮以熔膠定位，因為以高溫處理，所以較易整傷頭髮！
1.先準備用來熔膠的熱髮夾及已有膠封頂的頭髮束。
2.用熱髮夾把駁髮束和真髮一同夾着，大概2-3秒鬆開。
3.最後用手指搓髮束幾秒，令兩束頭髮混為一體。
4.真髮與駁髮束就以熔膠連在一走。
駁200束左右約$2,000
最易拆：鐵圈駁髮
鐵圈駁髮非常普遍，但工夫就比較繁複，而且睡覺時鐵圈有可能與頭皮接觸，容易產生痛楚或痕癢。但心急的朋友可以一試，因為整得快拆得快，一刻間變靚話咁易！
1.先準備小鐵圈、鈎子和用來駁上真髮上的頭髮束。
2.首先勾起一小束頭髮，之後將頭髮向後拉，令頭髮拉入圈子內。
3.將駁髮跟真頭髮一同放於圈子內，之後用夾子將鐵圈壓扁。
4.被壓扁了的鐵圈，成功地將真髮與駁髮束夾在一起。
鐵圈駁髮完成，薄薄一層約50-60束駁髮，約收費$1,500
駁髮最啱心急人「快、靚、正」
髮型師Jeff預計香港的駁髮熱潮會繼續流行，因為有好多人冇耐性留長頭髮，覺得駁髮方便，又可以隨時換Look。「我會推介HairPiece駁髮，因為相比起鐵圈同熔膠更方便打理，仲可以避免頭髮打棘的問題。HairPiece喺香港比較少人做，以往主要係明星先會做，不過我覺得所有客人都應該受惠到先至啱，所以我同Technician都會盡力幫客人做最適合佢嘅駁髮。」Jeff仲話連日本現時最Hit的前額劉海，都可以為客人度身訂做，鍾意緊貼潮流嘅朋友記緊留意！
