台灣加權指數噚日升2.5%，同恒指下跌2%形成強烈對比，觀塘張先生睇好台灣股票前景，所以推介台資股統一企業（220）。統一企業噚日收報4.37蚊，跌5.2%。
姚：姚浩然 玲：楊慧玲
張先生：我建議買入統一企業，佢入股即將上市嘅中國旺旺（151），相信台灣股票今年嘅勢頭應該會好好。
玲：佢之前連升三日，不過旺旺上市概念夠唔夠支持佢升。
姚：其實新股估值𠵱家比現有股份平，好似中鐵建（1186）市盈率只係二十幾倍，平過中鐵（390）08年嘅三十幾倍市盈率，旺旺上市嘅估值應該會平過統一，所以旺旺影子股概念唔係咁直接。
玲：我反而覺得通脹概念有機會令統一炒上去。
姚：食品價格上升，對統一有直接幫助。
楊：如果睇好台灣同內地嘅三通概念，廈門港務（3378）較為值博。
姚：統一較適合短炒，可以喺4.1至4.2蚊買入走番轉，博佢上到4.5至4.6蚊，如果冇影子股效應就要計數走人，止蝕位3.8至3.9蚊。
數碼通（315）
低位博炒一轉
李小姐：我揀數碼通（315），見佢啱啱公佈嘅業績同派息都唔錯，加埋之前跌咗咁多，所以想炒番一轉。
姚：數碼通未必維持到每年派高息，佢一向都唔跟大市走，當大市反彈，可能跟唔上。
李：每股盈利都只有27.8仙，但派息有28仙，好多公司都用高息𠱁啲散戶入貨。
玲：舊年同期冇派息，今年派番息，所以股價造好？
姚：派息之後會喺股價入面扣除番，只為收息而去追入唔值得。
--屯門李小姐建議--
建議買入價：7.67元 目標價：8.3元
止蝕價：7.3元 時期：一個月
滙豐控股（005）
睇上半年返$150
朱先生：我大半年前喺118蚊入咗滙控（005），你哋睇上半年有冇機會上番150蚊？
姚：上半年見150蚊難啲，唔少證券行估佢08年盈利會少過舊年，佢喺美國信貸市場嘅撥備仲有機會增加，相信要個市唔錯先可以上番130蚊樓上，如果上到140蚊，息率落番去4厘附近，未必能夠支持股價。
玲：目標價好似遠咗少少，之前跌到106蚊嗰時有冇諗過止蝕先？
朱：冇呀！次按最黑暗時間都過咗咯。我睇好滙豐，𠵱家再買嚟收息好唔好呢？
姚：𠵱啲位唔建議買住，起碼喺115蚊樓下先再入，冇必要𠵱家同人搶貨。
--觀塘朱先生個案--
買入價：118元 目標價：150元
止蝕價：- 時期：半年
中石油（857）
趁低位分段溝淡
葉小姐：中石油（857）你哋點睇？我12蚊入咗，應該睇幾多？
玲：佢嘅A股真係低處未算低，今日仲帶領大市下跌。
姚：佢有唔少中下游業務，油價高企對𠵱方面有影響。佢𠵱家估值唔算貴，1年有機會上番12蚊樓上。
葉：趁低位分段溝貨得唔得？
姚：10蚊樓下可以考慮再入。
玲：中石油係我嘅愛股，股神畢菲特之前話過再平啲會買番，值得長揸，去到9蚊我會瞓身買。
姚：油價大幅下滑嘅機會唔大，美元弱，嚟緊油價都硬淨，估計會喺100美元左右徘徊，石油股我推介中海油（883）。
--大角嘴葉小姐個案--
買入價：12元 目標價：-
止蝕價：- 時期：一年