睇英文報紙，偶然會睇到啲中文報紙冇刊載嘅「漏網新聞」，可以笑一餐。一啲英文笑話，繙譯成中文，就唔覺得好笑嘅嘞。
英文《虎報》變成免費報紙之後，有錢買唔到，未必人人都睇，但在中環街頭，《虎報》隨街派，左丁山幾乎每日都可以順手攞一份，見到唔少平時慳得就慳嘅少數族裔人士亦人手一份。二月二十七日《虎報》宣佈一位文筆幽默抵死，以前在《南華早報》寫「利是」專欄及後來在《遠東經濟評論》寫「旅行故事Travellers'Tales」嘅NuryVittachi會在三月三日起加盟《虎報》寫一個新專欄，咦咦，以後每日又有幽默小品睇，一樂也。NV話佢二十幾年前加入《虎報》，又再多二十年前，NV嘅爸爸在《虎報》打工，一家與《虎報》甚有淵源。NV立即講笑話（真人真事喎），一位英國心理治療師到亞洲開業，發覺有好多人問佢攞在一個亞洲城市印製嘅卡片，為之沾沾自喜，以為自己好受歡迎，會有好多病人搵佢。點知有日佢無意中睇清楚自己張卡片，佢嘅名字後面嘅名銜本應係XXX,Psychotherapist嘅，點知印製卡片個位仁兄大概唔識英文，將佢嘅大名印成XXX,PsychoTheRapist，為之暈得一陣。
二月二十九日，《虎報》體育版有段小新聞講布殊依照美國總統慣例，每年在白宮接見MLB「世界冠軍」，剛過去的一季係波士頓紅襪隊（BostonRedSox），球員去到白宮，與棒球迷總統布殊鬼咁好傾，吸引大批記者採訪，包括日本記者在內，因為RedSox隊有一位日本棒球明星DaisukeMatsuzaka，呢位仁兄每次出場，日本電視就會現場直播返日本，緊張過中國球迷睇姚明打籃球。布殊總統好識得自嘲，對記者講：「佢（指Daisuke）嘅記者群仲多人過跟住我嗰批（記者），而我同佢有一件事相同，就係用英語答問題有麻煩（WebothhavetroubleansweringquestionsinEnglish!）」，其實Daisuke啲英文，仲水皮過姚明好多，點同一位土生土長，仲係美國人、耶魯學士、哈佛MBA嘅喬治布殊相比呀？識得開自己玩笑嘅總統，總好過金正日。