又有政府前高官加盟私人機構搵銀，噚日持有九巴嘅載通國際（062）宣佈，委任苗學禮做公司同旗下附屬公司九龍巴士嘅非執行董事。今年57歲嘅苗學禮，舊年2月離開公務員行列，佢喺政府嘅最後一份job，係駐日內瓦世界貿易組織常設代表，原來苗學禮冇做公務員兼過完冷河之後，喺舊年11月，已擔任新地（016）持有部份股權嘅附屬公司──香港商用航空中心有限公司嘅非執董。
早已搵咗蕭炯柱
點解載通搵苗學禮做非執董，華華諗梗係佢嘅豐富管理經驗啦，話晒做咗幾十年公務員，喺佢咁多年嘅公務員生涯，最為港人熟悉嘅係96至02年做房屋署署長，點解？因為佢要為短樁事件下台嘛。
其實規劃地政局前局長蕭炯柱都喺載通度做獨立非執行董事，加埋董事長陳祖澤，睇嚟載通都好鍾意搵前高官睇實公司。