香港股神四叔李兆基近日先後到上海復旦大學及北京清華大學，接受名譽博士及名譽校董銜頭，上個禮拜五佢先飛去上海，兩名公子由上海開始一直陪伴在側，噚日喺北京清華大學更是全家總動員出席支持。包括二仔李家誠同靚太徐子淇、徐子淇父母，同埋甚少公開露面嘅四叔千金李佩雯。徐子淇一身黑色套裝，例牌拖實老公到場，任影唔嬲。
心血來潮要行街
華華走埋去細細聲同子淇講，四叔今年其中一個生日願望係再抱孫，問佢點睇，她甜到漏咁話：「盡量啦！」（咁係咪努力緊？）她就怕怕醜醜咁望住老公，唔知點答好。至於李佩雯外表雖然有啲cool，但都冇架子，她仲大爆四叔喺屋企講嘢都係好好笑，好識搞gag。
飛得去上海，四叔梗把握時間，巡視恒地（012）喺上海嘅樓盤，所以第二日，四叔就順道去睇南京東路155號個項目，呢個盤喺上海市最旺嘅南京路步行街，動工冇耐，仲圍晒板，基本上都冇乜嘢好睇。
秘書要袋定把梳
唔知係咪冇嘢睇，四叔唔盡興，所以心血來潮話想行步行街，睇吓個盤附近有幾旺，佢老人家好健壯，寧願自己行，於是恒地幾位高層包括副主席林高演等，同成班傳媒亦浩浩蕩蕩跟住四叔行街，都咪話唔墟冚。
呢次行程畀華華知道咗一個秘密，就係四叔原來幾貪靚。行街時有班攝記跟住佢影相，中途大風吹，四叔竟然唔理途人圍觀，叫跟咗佢好耐嘅秘書小姐Winnie，拎把梳出嚟幫佢梳頭。老老實實，女人袋住把梳一啲都唔奇，但原來做大老闆嘅秘書，都要幫老闆袋多把梳，厲害！
另一個搞笑位係，當林高演叫負責155項目嘅上海同事，向傳媒講解呢個項目，四叔忽然一條友健步如飛咁行咗去，班傳媒梗係好似蜜蜂咁，跟住四叔行，搞到呢位上海叔叔好鬼尷尬，林高演惟有走去捉番四叔返嚟，企喺呢位叔叔後面做佈景板，等記者專心聽介紹。
電郵：mailto:[email protected]