長實（001）及港鐵（066）一齊發展嘅將軍澳日出康城，上個禮拜五開售第一期「首都」，吸引唔少買家無懼堆填區惡臭，長實見大家咁踴躍入票，亦通宵賣樓配合。
睇番資料，上年通宵賣樓嘅情況甚少，反而06年都有啲，好似06年中嘅新地（016）喺馬灣嘅珀麗灣，連續三晚通宵共賣出近400個單位。另外深井碧堤半島、荃灣萬景峯、灣仔嘉薈軒嘅買家，都要通宵揀樓。
點解買樓都要通宵呢，唔通香港人真係唔鍾意瞓覺？定係半夜神志冇咁清醒，做決定會「快」啲呢？其實上年主要係冇乜大盤開售，通常矚目嘅大盤先會多人入票買樓，揀樓都有排等；加上發展商嘅賣樓方法，例如入票、抽籤、揀樓及簽約等，個個程序都要等齊買家先做，咁等法，自然要通宵先搞得掂。
開售地點遠離異味
講番首都開售，地點喺尖沙嘴港景峯，仲放定飲品畀買家飲；就算買完樓三更半夜返屋企，都唔怕冇車搭，華華覺得呢個都係聰明嘅安排，若然喺首都實地揀樓，未有交通配套，三更半夜食住西北風、聞住堆填區嘅異味，仲要搵車走，就真係唔知點算好嘞？