開心果沈殿霞（肥姐）日前病逝，終年62歲，無綫昨日在紅館舉行《肥姐我們永遠懷念您》追思會，800多名演藝界台前幕後人士及肥姐生前好友出席，包括有蔡和平、余子明、梁小玲、溫柳媚、盧大偉和羅蘭外，還有過檔亞視擔任董事兼營運總裁的何定鈞、張國榮生前密友唐鶴德、吳孟達、徐小鳳、黃日華及梁潔華夫婦、白雪仙、凌波、肥姐的澳門契媽林鳳娥、羅文胞姊譚文玉和溫哥華皇家騎警代表羅錦添等，盡顯人間「友」情。
採訪：駱華齡、王連連、李珮洳
羅嘉良：懷念響亮笑聲
「肥姐對後輩好好，佢嘅待人接物同奮鬥心好值得人學習，我好懷念佢嘅笑聲，好響亮。我每次見佢都會枕喺佢胸前講好舒服，肥姐就會話：『梗係啦，我胸襟廣濶』，佢好專業，好識照顧人。」
黃日華：提點夫妻之道
「佢好關心後輩，當時我老婆梁潔華（小圖）做EYT，肥姐成日同我講：『呢個圈引誘好大，唔好行差踏錯，要對老婆好啲，我唔放過你㗎』，有時我同老婆鬧交，佢會同我老婆講唔怕，等我打畀華仔叫佢嚟接你。」
方逸華：邵爵士唔捨得
昨日出席追思會的方逸華前晚欣賞杜明高演唱會時說：「邵爵士當然都知道事件（肥姐離世）啦，佢都覺得好唔捨得。」有傳無綫會錄用欣宜，她說：「暫時仲未同佢接觸過講有關事情，我知道佢最近都好忙辦理肥姐嘅身後事。」
關詠荷：佢態度好專業
「作為同事同觀眾，肥姐畀咗大家好多開心，佢嘅離開令人唔開心。佢嘅態度好專業，就算拍外景好辛苦，佢都唔會勞氣。」
吳孟達：鍾意請人食嘢
「我同肥姐當年合作《歡樂今宵》，佢好鍾意請人食嘢，記得之前同佢喺橫店拍劇《肥姐掛帥》時，佢成日煲湯畀大家飲，我仲好記得佢嘅笑聲。」
楊千嬅：支持欣宜入行
「我同肥姐合作過『四海一心加港情』表演，佢對大家好好，會同大家食嘢，我都好掛住佢。如果欣宜入行有需要會幫佢，支持佢。」
秦沛：一個義氣仔女
「我覺得肥姐係義氣仔女，佢好大貢獻。記得有年中秋節我一個人過，佢知道即刻打電話叫我去食飯，佢好照顧朋友。佢呢兩年病，過得好慘，我希望欣宜遺傳到肥姐對演藝界嘅熱誠，超越佢嘅貢獻。」
潘廸華：帶出正面訊息
「肥姐係一個好健康同有教養嘅人，佢帶咗好多正面訊息出嚟。」
陳友：不屈不撓藝術家
「肥姐係值得尊重嘅藝人，佢係一個不屈不撓嘅藝術家，我哋合作過拍MV，因為我太瘦，佢抬起我喺沙灘漫步。大家唔使擔心欣宜，肥姐畀咗好多嘢佢。」
最後致敬
