雖然有明星保母車美譽嘅ToyotaAlphard，快者要到5月先會喺日本正式登場，但日前網上已經流傳咗一批疑似新車嘅相片，另外仲有水貨車行喺報章大賣廣告，話開始接受車迷預訂新車咁話。哈，點知我車報員喺星期六嘅朝早，就即刻收到Toyota代理朋友嘅電話，話佢哋都已經開始收緊叫做Alphard350嘅新一代型號的Order，如果有車迷想買，大可以即刻走去佢哋嘅Showroom交低1萬蚊定金喎！
講番部車，聽代理朋友講話全新Alphard350嘅造型，同去年喺東京車展現身嘅FT-MV概念車差唔多，除保留咗原來嘅豪氣之餘，仲用咗全新嘅車頭設計；車廂方面，唔只同家陣嗰部一樣以空間闊落見稱，中排座椅仲係OttomanSeat設計連電控調校，從而令乘座舒適度得以提升。引擎則升格到3.5公升兼附DualVVT-i技術，馬力輸出足有280匹，波箱則係6前速+/-款式。至於大家最想知道嘅車價，代理朋友話大約係50萬元起，並有望跟日本同步登場；想捷足先登做頭批新車車主嘅你，咁就要快啲去Showroom問吓同落定啦！
記者：車報員