昨日在紅館舉行的沈殿霞追思會，安排了肥姐的一班好朋友上台致辭，眾人的發言情真意切，聽者動容。
陳寶珠：我同肥肥拍咗大概8至9套戲，喺片場拍戲都好開心，我哋會交換食物，因為大家都鍾意食，我好懷念嗰段日子。欣宜，希望你繼續媽咪嘅精神，薪火相傳。
蔡和平：肥肥係世界華人嘅驕傲。我好欣賞肥肥，佢係一個天才，好活潑，佢好專業，未試過一次遲到。過年前我入醫院做手術，欣宜同媽咪都有SMS畀我，叫我快啲康復，對我好關心，我好感動。
胡楓：肥肥份人好有人情味，好似有次佢入醫院做大手術前嘅一晚，我哋有位同事退休，我同佢一齊去歡送會，佢去到坐咗半個鐘頭同我講，話屋企有啲事要商量要走先，後來先知佢第二日要做大手術。另外，蕭芳芳因為佢隻耳有毛病，人多地方佢會頭痛，唔能夠出席，佢就託我同肥肥講幾句說話：「肥肥，你安樂啲啦，唔好掛心，希望你在天之靈保佑欣宜。」
李琳琳：我同阿肥喺13、14歲時就相識，到73年我哋去新加坡拍咗兩部電影，嗰時開始我哋成為無話不談嘅好朋友，每日都會通幾次電話，亦幾乎每日都會見面。呢30幾年，我同佢分享咗數之不盡嘅歡樂，亦分擔咗好多煩惱，甚至喺阿肥婚姻出現咗問題嘅時候，佢都會打電話畀我。
劉家昌：在去年10月份，欣宜的唱片已經完成了，結果因為TVB過年的時段都蠻淡的，為了宣傳，我們就延到3月，沒想到，沒讓肥肥親眼看到女兒出唱片，是我一個很大的遺憾。
胡錦：肥肥這一輩子，好像就為了讓大家開心才來到人間，她離開了我們，我想我永遠永遠都會記得她。我每天閉上眼睛，都會想到我和肥肥這40年來的點點滴滴。我真的很捨不得你，希望你一路好走。
