𠵱家好多家庭都用電熱水瓶，不過電熱水瓶用咗一段時間之後，內膽會出現黃色小點，好似生銹咁。查實呢啲唔係銹迹，而係水垢。小妹最近收到信興電器嘅單張，信興話水垢會越積越厚，唔單止令人覺得污糟，原來仲會影響導電效果，即係嘥電！
信興代理松下電器出晒名，佢哋專家之言，小妹梗係唔敢唔信。信興話，0.5mm厚度嘅水垢，就會嘥2%燃料；1mm厚度，就嘥3至5%燃料；5mm水垢就嘥15%燃料嘞。
坊間有唔少去水垢產品，好以日本松下嘅產品就賣25蚊一包，話係高純度檸檬酸。只要將半包檸檬酸倒入電熱水瓶，注滿水煮滾，一個鐘後將水倒走，電熱水瓶就光潔如新。信興話呢包嘢適合任何牌子嘅電熱水瓶，同埋最好每三至六個月就清潔一次。每次用半包，即係12.5元，都唔算貴。之不過，媽咪輩教落，有一個仲安全、仲平嘅方法，就係用切片新鮮檸檬！小妹試過，將檸檬片加滿水煮滾，放一晚，一樣咁work！
逢周一至周四刊出