港股噚日雖然大跌，無礙葵涌黃先生推介恒生銀行（011）嘅心情。恒生噚日公佈嘅業績相當靚仔，盈利大升51%高於市場預期，末期息亦大增超過五成，恒生噚日隨大市跌2%收147.1蚊。
孫：孫柏文 朱：朱紅
黃先生：上星期貼過恒生銀行盈利會有五成升幅，佢業績同我預期差唔多，上個禮拜143蚊買咗。
孫：你覺得聽日會喺乜位裂口高開？
黃：其實我睇淡美股，相信恒指聽日唔會裂口高開，不過恒生有機會去到150蚊左右，有少少水位賺。
孫：滙豐（005）業績好，恒生業績又咁靚，所以聽日好大機會裂口高開。𠵱家冇邊間銀行可以賺到錢，恒生仲可以增長五成，簡直係逆巿奇葩，所以你揀得好！
黃：我記得佢舊年7月公佈中期業績，有7、8間大行都唱好佢，之後嗰日股價大升。
孫：聽日股價應該都會一樣升。
黃：但係𠵱家外圍因素差嘛！
孫：如果我要買股票，我都會揀恒生銀行，佢比較穩陣。
《葵涌黃先生個案》
買入價：143元
目標價：150元
止賺價：145元
時期：兩星期
恒指put輪（5490）
驚滙豐撐起大市
David：臨收巿買咗恒指put輪（5490），怕聽日滙豐（005）會帶起個巿，一開連0.22蚊都冇，應該點好？
孫：滙豐業績咁好，恒指多數升，除非今晚美股大跌，你預聽日隻輪會跌。雖然日圓拆倉，美股都可能跌，但係滙豐可能都會帶起個巿。
David：滙豐一隻頂唔頂得住其他股跌？
孫：聽日滙豐升5蚊，已經中和其他股跌勢，聽朝put好過今日put。整體大市都係睇淡，喺熊巿買put輪，如果你止蝕價只係set低幾個巴仙，好易到價，如果買得唔多，應該長揸。
《西環David個案》
買入價：0.236元
目標價：0.26元
止蝕價：0.22元
時期：一個月
恒指put輪（5401）
市場睇淡跟put
溫小姐：近期聽人講買put輪，所以留意緊恒指put輪（5401），想問吓買恒指輪同其他股票輪有乜唔同？
朱：買股票同指數窩輪，都係睇吓係睇升定睇跌，買窩輪前要留意行使價、到期日，仲要睇埋其他條款係咪合適。（5401）行使價24600點，算係比較貼價嘅窩輪，不過隻輪街貨好多，佔成六、七成街貨，加印嘅窩輪仲會喺星期三上市，到時街貨量就更多。
溫：如果到期日恒指24600點會點？
孫：會變「零雞蛋」，1蚊都唔值。
朱：建議低買高沽賺差價，唔好揸到到期。
《太子溫小姐建議》
建議買入價：0.198元
目標價：0.21元
止蝕價：0.18元
時期：兩日
中油香港call輪（9951）
巿況差長揸等升
Frederick：我貼中油香港call輪（9951），09年第四季到期。𠵱家巿面有10隻中油香港（135）嘅call輪，巿況差，未來半年正股應該現水位徘徊，所以建議揸中油輪投資者，轉揸長年期call輪。
朱：中油香港唔郁或者跌，時間值損耗、引伸波幅收窄問題會浮現喎！
孫：你要揸年期長嘅窩輪，第一要佢短期內個股價冇乜點郁，第二要佢中期股價係咁升，你先有錢賺，但係買番正股起碼有息收。
朱：引伸波幅跌，隻窩輪價格都會跌，但係買正股股價唔郁，你都唔蝕。
《銅鑼灣Frederick個案》
買入價：0.183元
目標價：-
止蝕價：-
時期：一年半