鍾鎮濤（阿B）將喺嚟緊嘅星期五、六喺紅館舉行兩場「鍾鎮濤PremierLive08演唱會」，噚日佢同EO2喺旺角排舞，EO2除咗同阿B一齊跳舞外，仲做埋排舞老師。見阿B跳舞時，好似唔係好跟得上，阿B話：「我出咗七成功力之嘛，今次係第一次唔望鏡跳，所以有啲緊張，我又怕醜，相信正式時冇問題。」
阿B話演唱會冇辣身舞，連女舞蹈員都冇，因為今次個騷係以rock為主，唔係玩香艷。問佢係咪怕范姜唔鍾意？佢話唔係，係因為唔想有太多噱頭，只想着重番音樂。
「明白秋官心情」
問阿B演唱會啲衫會唔會露肉？佢抵死咁話：「想我露乜呀？露吓前面囉，跟吓潮流同你哋喺網度下載到啲相一樣，講笑啫，𠵱家露乜都冇所謂啦，露乜都唔夠網上下載嗰啲咁犀利。」此外，講到鄭少秋喺沈殿霞追思會上俾鄧光榮狂轟，阿B話：「其實唔係好想講，但我好明白做父親嘅心情，家家有本難念的經，做父親有時都好無奈。」