春回大地，好自然諗起櫻花，趁𠵱家天氣唔錯不如搵班朋友齊齊來個櫻花之旅吧！不過千祈咪誤會要走一趟日本，查實香港都有櫻花睇，而且周遭和風味甚重，趁接二連三嘅花期租部車仔遊車河，睇完櫻花仲可以睇杜鵑，大家齊齊嚟個香港「和」味濃程喇！
記者：梁美甜
攝影：陳盛臣
模特兒：Joanne、Carey
港版和歌山自駕賞櫻
就快有個長假期，唔想出埠都可以喺香港嚟個「和」味之旅㗎，趁周末或嚟緊嘅復活節假期，平平哋租部七人車同好友賞花，心情都靚啲！
香港山路無Feel？錯喇，香港都有個和歌山，邊度？咪就係位於大帽山腳屬大埔區嘅嘉道理農場暨植物園囉！有車最大好處係方便到老人家同埋我哋呢班貪懶貪方便嘅人。揸住部車直駛山頂附近嘅胡挺生先生紀念亭，事關呢度就係園內櫻花最集中地方之一，最引人入勝嘅係沿山路而行，沿途花樹林木茂密，加上花花顏色各有不同，姿態各有風采，營造出優美而具層次嘅景觀，足以媲美日本和歌山，再來一個野餐，就算唔使飲酒唱歌都「和」味斐然！
以為始終香港屬亞熱帶氣候，對生於寒凉氣候嘅櫻花而言實在有點為難，殊不知香港嘅櫻花亦有佢風姿綽約嘅一面，依然吸引，氣質亦可媲美大和櫻花，怕只怕香港無日本般成街成行沿河行人道般嘅櫻花樹啫！
繁花似錦
入春後，唔同品種花期相繼而至，好似紅黃白吊鐘花、紫紅色花葉嘅杜鵑亦滿山皆有，就連香港市花洋紫荊同佢姊妹花宮粉羊蹄甲都可以輕易欣賞得到。
同豬豬合照
既然叫得做農場暨植物園，除咗一系列花花之外，仲可以走入園內嘅農場，入面有唔同嘅牲畜同動物，兩棲爬蟲類到飛鳥或野生動物都有，黃麖、穿山甲、野豬、貓頭鷹等都可以一次過睇晒。再唔係，仲可以走去有機農場睇吓有機耕種係乜東東，老人小童就一定感興趣，Joanne同Carey就係大細路，一見稻草人即刻飛身同佢打招呼兼猛影合照㖭！肚仔見餓大可到農場小賣店買有機食物醫肚，再參觀一下農場博物館，認識一下昔日香港務農生活都幾好吖。
過隔籬林村許願
點去好？
大帽山路線：由荃灣出發，經綠楊新邨上荃錦交滙處轉入荃錦公路，沿大帽山行，到山腳迴旋處見大埔指示牌，轉右入大埔方向之林錦公路，經過凌雲寺後，行多陣喺右邊就見到嘉道理農場個門牌。
九龍路線：經獅子山隧道或大老山隧道入吐露港公路，駛往粉嶺方向；到康樂園迴旋處後轉左入林錦公路，再行約10分鐘就到。
自駕遊要早約
農場屬非牟利機構，只象徵式每位收入場收費$10，若然想揸車遊農場，就要喺星期一至五至好去，因為周末多團體唔俾自駕遊，仲要一早打定電話預約，事關入面唔多車位，留定位就自駕或泊車步行都得喇！
查詢：24837200
租車自駕話咁易
租車手續方便快捷，只須兩年車牌（國際牌都得）、年過25歲及帶埋住址證明就租得車。想預早Mark定心水靚車，好似我咁要部又新又坐得人多嘅七人車？咪早啲打個電話、傳真又或者上網預約，當然最直接方法就係親自上租車公司辦手續喇！以呢部2007年日產Presage2.5為例，周末Package玩足四日，價錢都只係$2,200，抵玩過日租。租車嗰陣會跟埋張油卡，指定油站入油會有折扣，慳唔少㗎！不過復活節價錢有所調整，詳情不妨打個電話問吓先！
大昌行汽車租賃服務：27682277
