遊京都，大家有冇去俗稱「花街」嘅京都色町玩番轉？上集PS2版《人中之龍》將新宿歌舞伎町呈現眼前，今集PS3版更帶你返去1605年嘅京都祇園睇盡藝伎生活百態……係喎，乜呢隻唔係角色扮演+動作遊戲咩？乜都唔記得咯！
記者：陳國輝
老江戶重現眼前
故事背景完全唔覺老土，主角武藏因誤殺最具勢力嘅德川家族繼承人，搞到全國都通緝緊佢。最慘嘅係戰友、女友相繼被殺，佢把心一橫，連名都改埋，隱居祇園，諗住成世做保鑣就算啦！點知佢真係好黑仔，冇幾耐，又俾人屈殺咗佢全家。為求清白，武藏於是決心要查出背後真相。
記得喺TGS（東京遊戲展），筆者已率先睇過《人中之龍~見參！》嘅Trailer，印象咁深刻，除因為有靚㗎妹扮成藝伎介紹遊戲，更震撼係故事裏頭嘅京都祇園，不論大街小巷、舖頭、平民服飾以至400年前嘅煙花晚會等，一一再現眼前；但筆者相信，更多電車男應該係受到藝伎嘅表演所迷惑……
祇園觀光點
八成睇靚仔靚女
《人中之龍》首次喺PS3登場，全因支援1080P高清關係，無論人物、動作，還是京都花街嘅環境塑造，都令玩家拍案叫絕，比上集PS2版靚足幾條街！但最令筆者難忘，就係人物臉形嘅刻畫好細緻，例如主角貴為一介武夫，當鏡頭作近距離CloseUp的時候，莫講話鬚根，就連皮膚粗幼、毛孔，甚至連幾粒「酒米」都睇得好清楚。至於喺遊戲內經常出現嘅「遊女」就更加索到暈，如果你完成呢一章，遊戲仲提供「回憶」片段，幾咁親切！
學招式靠食腦
假如你諗住隻遊戲類似Capcom《鬼武者》有咁多機會畀你打打殺殺，買咗之後肯定後悔！其實《人中之龍~見參！》僅兩成左右時間具動作成份，但貴精不貴多，遊戲已提供好多武器同招式畀主角使用，特殊絕技更要你由「思考」中領悟。嘩，講到咁深奧嘅？呢樣亦屬遊戲一大特色，例如武藏因被女色迷惑，佢惟有喺瀑布上作內心修練，直至成功「得道」，先學識呢招；又有一次，主角從老鼠與蟒蛇搏鬥中悟到道理，從而學會新招亦唔奇。
MiniGame賭日圓
唔知係咪老京都人特別喜歡賭博。遊戲內提供幾款MiniGames，其中有類似玩「牌九」嘅小玩意，如果唔鍾意賭，又可以練吓自己眼界，玩騎馬射術。
PROFILE
機種：PS3
類型：劇情+動作
開發商：SEGA
售價：$398
發售日：3月6日