細細個冇近視時會羨慕人哋戴眼鏡，到真係要自己日日戴住，就開始後悔。反正已經冇得選擇，我呢個四眼妹惟有戴得靚啲型啲唔同啲。近年新鏡技術頂呱呱，但有朋友就開始儲Deadstock舊鏡，係囉，我又唔係齊人，講乜左右逢源啫。頭就得一個，無謂學損友買買買，買咁多限量版都係求限量罕有，戴優質Deadstock滿足晒我需求。
攝影：伍慶泉
網址：http://appleblogpaper.blogspot.com
aboutme:
fluffy
周圍逛、周圍蕩是我的嗜好。從來不怕人生苦短，只怕成世人流流長兩腳一伸，沒任何值得回憶的畫面，一直堅守嘆盡、嚐盡、玩盡這人生三大目標。一世勞碌只為銀行的幾個數字才是大笨蛋，寧花盡一分一毫，也不願使剩半角三仙入棺材。
跟日本仔追舊鏡
我11歲開始，就加入了四眼一族。
人大了，開始講究，買眼鏡學人睇吓牌子、款式。所謂名牌，不外乎RayBan、Cutler&Gross等，睇得多都悶，後來迷上Deadstocks，講真，剛接觸的確係要潮又貪平的藉口。
某日於中環亂衝亂撞，被一間眼鏡小店所吸引，店內都係Deadstock舊鏡。我跟80高齡伯伯大談60年的眼鏡情時，猶如在榕樹頭下聽古仔，開始感到每副舊鏡背後的故事。
佢話咪叫伯伯，叫佢Wilson。Wilson話，個故事係由1944年開始的……
「當年開舖時，全香港只得17間舖賣眼鏡。舊時香港眼鏡業好風光，好多鬼佬會專登嚟香港買眼鏡，特別多美國水兵，佢哋鍾意ASIAOPTICAL，因為香港出口的眼鏡出名質素好。就算返到美國，佢哋都會MailOrder嚟幫襯我。鬼咩！以前美國佬做副眼鏡要20日至2個月，我就3日起貨。」近年已經無心戀戰的Wilson伯，猛話自己近年其實賣垃圾：「都唔明後生仔買咁多垃圾返去做乜？佢哋跟日本仔之嘛，十幾年前已經有個日本仔嚟我舖頭掃貨，一次過買咗1,600副眼鏡。我幾十蚊副賣畀佢，佢¥30,000一副放喺上野公園擺地攤。」
我都話香港跟住日本人走，不過慢了10年。
死貨變古董
Deadstocks俾識貨之人掃得就掃，想平價入手已非易事。眼鏡迷開始不惜工本，好似Martin咁，直情收購全間ASIAOPTICAL舊舖，配上「合理價」發售。往日的一百幾十，今日賣$1,000-$3,000，某些罕有款甚至無標價，須面議。
Martin：「唔同年代都有代表性眼鏡，都好有歷史價值。而且70年代前，眼鏡都係啲大班紳士戴，所以係上等人產品。喺80、90年代轉型為MassProduction，眼鏡先變平價貨。」
Wilson伯話：「4、50年代最出名嘅眼鏡都係眼鏡廠，好似美國AmericanOpticalCompany（AO）同德國N&G。冇咩名牌㗎！後期啲牌子賣開化妝品賣開衫，走去出眼鏡。最多人買係Dior，賣成$700副，貴到死！都唔明有咩咁巴閉！」
新牌鬥技術鬥到難分難解
聽完伯伯數邊個明星上去買、邊套戲有佢賣的眼鏡……我開始沾上舊眼鏡的一份情。慘喇！我開始有點兒想捨新懷舊。
儲了10年眼鏡的WD40話新舊都儲：「𠵱家眼鏡設計差不多玩到盡，鬥技術、用料鬥新鮮。咩長毛象牙、木、四方竹都陸續出現。」日本同歐洲對眼鏡研發鬥到你死我活，但越高難度的創作，我哋付出的代價就越大，整整下副副起碼幾千蚊先有交易。諗深一層，都係念舊情儲舊鏡計落有着數好多。
查詢：AOC（28155799）
中環鴨巴甸街11B地舖（近九如坊）
最新回應
Debbie：睇番啲舊戲，會見到60、70年代嘅舊眼鏡，嗰種味道係新款眼鏡代替唔到。之前一直唔知邊度有得賣，行過幾間舊舖，我都以為已經冇晒呢啲Deadstock。原來仲有咁多！
Ben：我有副古董RayBan太陽眼鏡，係我媽咪留畀我，起碼有30年歷史。我會好好保存，因為覺得好有紀念價值。但我就未必會買出面啲古董鏡，紀念價值冇咁大。
Steve：我儲開80年代嘅太陽眼鏡，細個開始買一副儲一副。以前買都係幾百蚊副左右，𠵱家要過千蚊副都幾搶錢，我都要慢慢儲到我啲眼鏡變古董先！