富豪接班人呢幾年陸續登場，跟隨長輩出席公司活動，甚至擔大旗主持㖭，呢班未來大孖沙以前可能柴娃娃一齊玩，但出到嚟社會做事就唔同咗，第日埋身肉搏嘅機會都好大。
即如華置（127）大劉個仔劉鳴煒，之前頻頻跟老竇出場，包括去觀摩政府賣地，佢06年加入華置，06年底就正式出任執行董事，舊年佢已經同老竇一齊出席業績記者會，呢個禮拜五（7號），佢會喺公司公佈業績前，負責介紹08年華置嘅新樓盤。華置唔少香港樓盤都係同人哋合作，又或者係市建局嘅重建項目，大陸同澳門都有啲。近年大劉仔周不時都會講吓物業發展大計，睇怕日後地產銷售呢瓣由佢打骰都冇乜得走雞。
華華記得，過去啲地產富豪新一代出嚟推銷樓盤，成績都唔錯，比較深印象嘅係啱啱先陪老竇四叔去上海同北京嘅李家誠，佢04年負責推售西灣河嘉亨灣，吸引到玩具大王鄭氏兄弟同賭王四太梁安琪掃貨，結果第一批共400個單位一日內就幾乎賣晒。
家誠賣得 寶文計多
至於富豪酒店（078）喺赤柱嘅富豪海灣，就係由集團主席羅旭瑞嘅愛女羅寶文打骰，佢諗頭多多，一手包辦市場推廣、示範單位設計，連廣告歌都自己填詞，跟住又搵郭富城、陳慧琳、李克勤及許志安等歌星嚟拍攝音樂特輯，sell星級豪宅形象，令人對呢個小妹妹刮目相看。
大劉仔舊年首次登場即擔大旗主持一項澳門住宅項目銀團貸款簽約儀式，嗰次老竇大劉仲特登坐觀眾席捧場，之後佢跟老竇出席過幾次華置記者會，包括公佈業績同股東大會，可以話參與過唔同活動，但負責推銷樓盤似係第一次，佢會有幾掂，真係要放長雙眼睇吓喇。
電郵：mailto:[email protected]