呢日有事到中央圖書館，無意中發現有一個「近代中國證券展覽」，於是偷空走入去行一個圈，裏面展出好多近代中國公司股票，例如一九一三年漢冶萍煤鐵廠礦有限公司股票、一九○六年滙豐銀行股票、一九○八年大清銀行（現中國銀行）股票，左丁山特別留意到一張民國三十五年（一九四六）上海申報股票，有好多人簽名，其中一位係杜月笙。呢批股票從何而來呢？問清楚，原來係中華人民共和國「上市公司股票第一博物館」提供嘅複製品，但肉眼難分，似足真嘅一樣，真品當然係藏在「上市公司股票第一博物館」啦。
展覽由中文大學歷史系、第一博物館主辦，康文署協辦，中國銀行贊助。同時有一個「中華貨殖論壇」，講中國資本市場百年回顧。講者有科大衞教授、梁定邦、周文耀等，已經全部舉行，股票展覽亦在三月四日結束。左丁山唔早一啲知道，可惜也。
睇完展覽，行經維多利亞公園，自然想起逢星期日早上舉行嘅《城市論壇》及維園阿伯。幾日前聽到一位前女高官講，佢曾經被上司指派出席《城市論壇》，為政府某項政策辯護，頂住其他人嘅批評。佢因為表現出色，上司大讚，錄影帶作為其他同僚嘅學習示範。之後就發覺自己官運亨通，升級快過人，佢先至明白出席《城市論壇》為佢帶來之實際好處。
出席《城市論壇》之官員，多是首席助理秘書長級數或署長、副署長級數，職位唔高唔低，佢哋到論壇，視之為口才與臨場應對之口試，如有差池，在觀眾面前出醜，後果難料，故此唔少AO唔係好願意去；相反，如果臨場表現淡定，兵來將擋，頂住民主黨、民建聯議員猛攻以及維園阿伯、現場觀眾質疑，就會有機會畀人睇中，點知道特首有冇啱啱開咗電視，因電視直播而認識呢位官員，留下印象㗎！左丁山多數在星期日中午十二時已經去咗馬場，好耐冇睇過《城市論壇》直播咯，唔知現在情況係點呢？