沈殿霞追思會《肥姐 我們永遠懷念您》昨日在紅館舉行，肥姐好友鄧光榮上台致悼辭時，激動地狠批肥姐前夫鄭少秋未有好好盡父親責任，要秋官上台交代，頓成追思會焦點，但肥姐一班好友如曾志偉、羅家英、白韻琴和好姨薛家燕等，均力撐秋官，認為秋官沒有疏忽照顧欣宜。
汪明荃昨日因到內地開政協會議，未能出席肥姐追思會，但其男友羅家英昨日有出席追思會向肥姐致敬，對於鄧光榮公開在台上狠批秋官，羅家英感慨地說：「相信佢（鄧光榮）好錫阿肥，佢經常咁鬧阿秋㗎啦，唔係今日嘅事。秋官唔係唔照顧欣宜，佢冇乜問題。」
盼保和諧
「傷害咗肥姐兩個至愛」
問羅家英可會覺得秋官受委屈？他說：「係，好委屈，係啲人多鬼餘，兩夫妻嘅事關你乜嘢事？佢哋相處咗20幾年，可能秋官做咗好多嘢，唔可以因為離婚同因為嗰個係肥姐，而要秋官做多啲嘢，阿秋已經仁至義盡，唔可以要求人哋做啲乜，人哋都有自己立場。」
曾志偉也忍不住搖頭嘆息說：「呢啲係人哋家事，自己解決啦，可能當中有好多自己苦衷，呢個場合唔適合，真係覺得佢（鄧光榮）激動咗少少，呢個係追思會，唔係檢討大會，肥姐、欣宜同秋官一家人，閂埋門可能好close，肥姐都唔想見到咁嘅場面。」
看不過眼的白韻琴則說：「我覺得鄧光榮好過份，雖然同佢係老友，但肥姐鍾意和諧開心，肥姐如果喺度一定唔鍾意，因為傷害咗肥姐一生中兩個至愛，就係欣宜同秋官。如果秋官對官晶華做得少又俾人鬧，秋官作為人哋前夫同現任丈夫，已經有情有義。作為肥姐兄弟，鄧光榮幾唔開心，勸解人哋都唔係喺度。」
森森是秋官的舊愛，對於鄧光榮狠批秋官，森森說：「我哋應該好似肥姐咁講向前看，唔好睇番轉頭，如果錫肥姐，就要尊重肥姐鍾意嘅人，唔好喺細微嘅嘢度挑骨頭。佢（秋官）係欣宜爸爸，要話佢有問題嘅話，欣宜細細個都已經係咁嘅啦，何必要咁？成個追思會最唔開心呢一part，當然好多人錫肥姐，但我哋係局外人，況且肥姐之後好大方接受番佢（秋官），過咗去咪過去囉，大家既然錫欣宜，都要錫埋佢爸爸，愛屋及烏，真係唔明點解要咁樣，私底下個女要埋怨爸爸係佢哋家事，唔明點解令到個場面咁難堪？我都聽到有人起哄，其實秋官做人都好難，嚟又俾人話，唔嚟又俾人話，唔知點解啲人咁激動？」
好友心痛
「外間唔好再挑起是非」
薛家燕指秋官沒去加拿大出席肥姐喪禮是因有工作在身，她說：「大家要體諒，佢對肥姐好好。鄧光榮同肥姐係銀鼠隊成員，大家兄妹情深，佢愛錫肥姐大家好明白，不過以前嘅嘢都過咗去，秋官都有愛錫欣宜嘅心，鄧光榮應該喺呢個場合緩和啲，有唔啱咪拉埋後台傾，我相信肥姐見到呢個場合都會唔開心，其實肥姐都原諒咗秋官，佢最大心願都係養大個女，佢已經好豁達唔再斤斤計較，外間唔好再挑起呢啲是非，大家用心懷念肥姐啦。」
肥姐契女劉雅麗指她很錫秋官，大家錫肥姐的話應該錫埋秋官，劉雅麗說：「今日為咗紀念肥姐，唔好破壞，我覺得觀眾過激，唔滿意都唔好嗌出嚟。」跟肥姐份屬好友的狄波拉，昨日被問到鄧光榮批評秋官一事時說：「每個人嘅情緒唔同，欣宜嘅處理好好；可能秋官較被動，因為見有好多人幫緊手，家家有本難念的經，欣宜始終係姓鄭。」
身為肥姐昔日《歡樂今宵》拍檔的盧大偉和安德尊，均認為欣宜陪秋官上台，已證明他們父女間沒有問題，而米雪和陳文輝希望大家能給秋官和欣宜空間外，更大讚欣宜在今次事件處理得很好。自言看着肥姐入行的潘廸華，也認為鄧光榮在追思會上的舉動很不應該，希望大家能讓肥姐安息。而陳淑芬昨晚則表示沒有不滿鄧光榮。
採訪：王連連、卓寶花、駱華齡
攝影：林德雄、陳慧安、陳俊強
