舊年聖誕前同證監會分手嘅公關阿頭陳志強（人稱CK，之前係證監會傳訊科主管），休息咗兩個月後，再度重出江湖，大家估唔估到佢去邊？華華就估極都估唔到，原來去咗小小超間8號仔電盈做企業傳訊部副總裁，代替剛剛走咗嘅韋頌恩（JoanWagner）。
專應付外國傳媒
CK上周一已經返工，負責同西人傳媒打交道，正所謂隔行如隔山，咁跟開電訊新聞嘅行家，電盈內部人士，自然想知道CK嘅為人處事係點啦，其實都冇咩嘅，做咗監管機構十幾年，包括廉記加證監會，自然係官味濃啲，可能佢要求自己同要求他人一樣極高，所以CK過往手下流失率甚高。
不過，呢啲都係過去嘅事，既然CK𠵱家跟咗小小超呢個反斗星，睇嚟可以收起嚴肅，一於融入8號仔嗰種（無論係對官府、競爭對手以至各位股東）都玩到盡、玩到反轉嘅文化，開開心心展開職業生涯新一頁，咁就為之verygood啦。