有大眼妹之稱的江若琳，早前到菲律賓拍攝寫真集，趁空檔四出觀光，還到動物園探訪同樣擁有一對大眼睛的瀕臨絕種動物眼鏡猴，一人一猴鬥大眼，相映成趣。不過入住全新酒店的她，在露天浴室洗澡時竟有裝修工人在外走動，嚇得她馬上穿回衣服。 撰文：比華利
江若琳早前到菲律賓宿霧和蘇碧灣拍攝寫真集，趁機四出觀光耍樂，甫下機她已急不及待換上tubetop及短褲，爭取時間同陽光玩遊戲。蘇碧灣位於菲律賓呂宋島的西岸，自1992年美軍撤走軍事基地後，那兒便發展成為旅遊熱點。
「會發脾氣攻擊人」
問到江若琳行程中有甚麼難忘趣事？她說：「我哋入住一間新開張嘅resort，新到我哋係第一批住客，間房仲有露天浴室，有一日我冲緊凉時，竟然見到有裝修工人喺附近，嚇到我嗱嗱聲着番衫，唔敢再冲。」
江若琳出道以來憑一雙大眼睛作為招牌，並有大眼妹花名，此行往動物園參觀時，竟讓她「他鄉遇故知」，看到瀕臨絕種的眼鏡猴，江若琳說：「眼鏡猴係受保護動物，係全世界最細嘅馬騮仔，得我手掌咁大，但有一對大眼，好可愛。」
眼鏡猴的生活習慣是白天在樹上睡覺，因警覺性好強，會睜着眼睛休息。江若琳謂即使看到眼鏡猴張開眼睛看着你，也不要誤會牠等人逗玩，她說：「佢可能係瞓緊覺，萬一騷擾到佢，激嬲佢，就會發脾氣攻擊人，我建議大家眼看手勿動，否則會中招，其實熟睡中嘅佢真係好得意。」她更刻意瞪大眼與眼鏡猴比拼，十分搞笑。
性格活潑開朗的江若琳酷愛水上活動，面對當地舒適的環境，兼遠離香港石屎森林，也顯得份外生猛，她說：「我份人紮紮跳無時停，一向都鍾意戶外活動，尤其係水上運動，因為一邊享受陽光一邊浸喺水入面，真係人生一樂也。」
陽光猛做好防曬
為應付菲律賓的酷熱高溫及猛烈陽光，江若琳一早做好防曬措施，她說：「其實嗰度嘅陽光係曬，但曬落皮膚度唔會太辣，反而曬完會令皮膚增添一層健康色彩，所以我係唔介意做『賓妹』。」
話你知：霧浮潛夠relex
宿霧景色怡人，海水清澈，江若琳大讚：「水天一色，真係靚到不得了，我好鍾意玩浮潛，我哋坐快艇出海，喺教練指導下將身體放鬆平放浮喺海面，睇到水底下面嘅魚，同佢哋零距離接觸，感覺好舒服，好relex。」
話你知：炭烤海鮮夠鮮嫩
由於菲律賓沿海，海產豐富，加上水質良好，所以海產非常新鮮，江若琳親手揀選活生生的龍蝦和鮑魚，然後交給附近餐廳的大廚用炭爐燒烤，即煮即食，她說：「實在太美味，佢哋將海鮮用炭爐烤到剛剛熟，海鮮保持鮮嫩，特別係啲鮑魚，唔單止唔韌，入口好鮮甜，我一口氣食咗6隻。」
