認識尹光，源於幾年前唱K友人點了他的《少理阿爸》！見到佢一人分飾阿爸阿媽阿仔，唱唱吓褲襠多個尹光仔，我笑到碌地，從此明白尹光潮過豹紋。得悉他今年演唱會名為「好過癮」，抓緊機會過癮一下。以為會黃色笑話橫生，粗口嘟嘟聲講得兇，點知佢話：「我唔講粗口，若然真係好嬲，先會講句『做乜攬嘢！』嗱，呢個『攬』字係正字，攬埋一堆又叫攬！食嗰啲又叫欖！拎嗰啲又係籃，係咪先？」聞言，連攝記影完相都要同佢合照！尹光搭着我們肩膀，邊影邊說：「演唱會記住嚟後台探我！」
尹光，真係好攬，過癮！
記者：馮冠芝
攝影：陳陶鈞
奧運超人光光
尹光每年一個演唱會，但今年是名副其實的過癮，有嘉賓朱咪咪與盧海鵬助陣、將大戲《沙三少與俏銀姐》改編成時代曲音樂劇，由尹光自己執筆填詞。我聽得一頭霧水，他說他就是演沙三少，個性鹹濕鍾意索油。我頓時想到粵語殘片月黑風高大少大喊：「你叫啦！你叫得幾大聲都無人應你哈哈哈！」仲要係音樂劇版本？尹光，果然愛突破！「其實我由細到大都做啦！呢種叫幻境新歌，要唱吓、講吓，搞笑吓！」除音樂劇，尹光一串新歌將08國事家事擺上枱；國事奧運，歡歡晶晶，唔差在加個「奧運超人光光」，用《如來神掌》的曲，配上「乒乓波我最叻，瞓身拉波馬琳亦怕。」家事講「兄弟」：「班水呀確係最方便，𠵱家想借貸每月要攤還！」新詞舊曲，曲目係《哥仔呀靚呀靚得妙》，呢位哥仔，仲唔係安信？
少理阿爸 大學生當我劉華
但最令我期待，還是他在演唱會首次演繹《少理阿爸》，上一輩靠《荷李活》、《雪姑七友》熟知尹光，但十幾歲𡃁仔𡃁妹在街上找尹光簽名，卻是因為《少》，「幾個月前，我往大學做Show，千幾個大學生當正我係劉德華咁湧過嚟，原來就係因為呢首歌！所以我今次唱，就係為咗吸引年輕人入場！」《少》於02年面世，時至今日依然有不少Blog友稱此曲為他們的K歌。潮得起，尹光直言歌詞出自年輕人手筆，該不會其實他只唱不知其意吧！「唔明歌詞點會唱得好？我唱《少》好似唱粵曲咁，唔明就問，歌詞『有錢就𠝹天鵝肉，無錢就𠝹豬腩肉』我就問咩係𠝹？後生仔答：『𠵱家用𠝹唔用媾啦！』」做到終生學習，《少》MV尹光扮放貴利，扮埋貴利老婆幫手做登記，舊曲《數波波》就錄個Disco版，難怪年輕人不識豹紋，只愛在K房扮尹光Rap到頭暈。
唔俗唔紅
從《十四座》到《少理阿爸》，潮足咁耐，講得唔好聽，卻是俗足3、40載。黑膠唱片年代，尹光曾有一隻碟A面灌情歌，B面灌口水歌，但當年他在酒廊演唱，A面永遠乏人問津，尹光卻從不介意，「仲開心！若果當時我唔轉歌路，唔好話唱足38年，唱10年都可以返歸了！因為我呢種草根歌，可以話係獨食無人爭！」咁阿Sam算唔算唱草根歌？「阿Sam有少少似，但佢係歌神，我就中中亭亭！都係低調啲好，咁先可以長食長有。」所以你可以紅咁耐？「我都未紅過！唔係人哋學唔到我，係無人肯學我！」
講緊嗰啲係心口毛
無人想學廟街歌王，有說是難登大雅之堂。DJ唔敢播尹光的歌，解釋說他的歌不健康。網上的確有好多聲稱是尹光唱的超鹹爆粗歌，但全部老屈當秘笈，尹光唔唱粗口歌，亦唔講粗口，「30年前，我在國際夜總會表演時說了一句粗口，當時我覺得自己好肉酸，從此決定戒粗口！」無粗口，歌曲還是被稱為不健康，「只係你哋用另一個角度睇我唔健康！」說着，尹光哼出首本名曲《數毛毛》：「毛呀毛，我數呀毛，周身都係毛，有一種睇唔到的毛，呢種毛唔係個個有，細路仔無我都無……總之心照。」再來《數波波》：「毛神神疏疏哋又係波……」咁都叫健康？「呢一種叫心口毛！波波就係唱緊羽毛球咋！你話邊度唔健康？只係好敏感引導你留意！」Die-hardFans攝記插嘴：「係喎，唱嗰個唔鹹濕，係聽嗰個鹹！」我呆呆點頭，9秒9後才驚覺自己被人擺了一道！咁都過癮嘅。
尹光08好過癮演唱會
日期：3月10、11日（8:00pm）
地點：香港文化中心音樂廳
票價：$350、$250、$180、$120
查詢:81118111