最近身邊有兩位朋友不約而同咁做咗新款Mazda2嘅車主，問佢哋為咩揀佢，一個就答部車個樣夠型，一個就話性能唔錯又慳油，搞到唔知信邊個好。既然係咁，我就特別借咗一部Mazda21.5Freeway嚟做一次4日3夜嘅長期測試，結果係點？咪就係一揸佢出街就有好多人望到實一實，而且仲要係老中青都有，收視率隨時高過SuperCar！
記者：鄭達基
攝影：伍慶泉
模特兒：Carey
人人以為係跑車
朋友Mike同我講，話揀新Mazda2嘅主要原因，係佢同太太都覺得部車個樣好後生好Sporty，望落唔似其他同級對手咁嚟得呆呆笨笨，又或者係已經見到厭喎！
嗱，我真係好認同佢所講嘅嘢，因為上一代嘅造型的確係傾向房車化，畀人嘅感覺係比較斯文成熟，好似唔係太啱年輕人嘅口味；但嚟到呢一代就唔同啦，廠方唔只為佢刻意勾畫出一個圓潤而流暢嘅造型，最重要係喺呢款Freeway版身上，加咗一套原廠嘅跑車包圍，喺四輪15吋跑車合金胎軨嘅襯托下，真係好似成部小跑車咁。最佳嘅例證，就係喺試車旅程嘅其中一日，我揸住佢出席一個宴會，沿途已經有唔少人望到部車實一實，散席後載朋友回家時，佢哋見到部車嗰陣都覺得佢係跑車，完全唔似一部城市小車，可想而知新車換咗個跑車Look之後，收視率即刻比以前高咗好多呢！
車廂空間算闊落
揸開大房車嘅我，對於要揸返一部車長唔夠4米嘅城市小車，真係好擔心佢嘅車廂空間，究竟係咪可以令到我呢個肥仔，無論身處喺前座抑或後座都可以坐得好舒服……
為咗測試佢嘅車廂空間對我嚟講係咪足夠，所以特別坐勻前後兩排座椅，個人覺得前排嘅腿部同頭部可用空間，都要比上一代好好多，唔會覺得好逼狹；至於後排就真係差些少啦，即使腿部空間都算OK，話就話可以坐3個人，不但因為要遷就流線型嘅車體設計，而搞到頭部空間唔多夠，如果你生得高大嘅話，坐喺後排（尤其係中間嗰位）就真係頂天立地啦！好在，揸咗新款Mazda2咁多日，覺得最正都係佢嗰個好似RX-8嘅中控台設計，唔只賣相夠晒簡單，設備又夠齊，而且喺三幅式軚盤上面，仲加咗音響組合嘅控制鍵，揀碟聽歌或者調校大細聲，真係話都無咁易。當然唔少得仲有就係佢嗰個超大尾廂，喺唔放低後排嘅情況下，擺個大篋落去之後都仲有位剩，試問家陣有邊部小車可以咁做吖！
好力慳油又掟得
至於朋友Louis買Mazda2嘅原因，正正係因為佢改用咗MZR全鋁合金製嘅1.5公升直4引擎，喺S-VT技術嘅輔助下，令到部車嘅動力輸出數值唔錯之外，仲係好慳油嗰隻㖭！
老實嗰句，以前聽唔少人講話上代Mazda2嘅耗油量偏高，加埋家陣啲油賣得咁貴，要慳油真係唔容易，所以令我喺試車之前都有啲擔心。不過，喺呢次長期試車嘅旅程入面，合共入咗$430油，而所行嘅里數就有成359公里，計落條數佢嘅平均耗油量都不過係$1.2/km左右，都算OK吖。仲有就係部車嘅底盤結構設定由於傾向跑車化，加上四個車輪幾乎喺部車嘅四隻角之上，所以喺彎路都可以肆意疾走，不過後排乘客就要暫時忍受稍硬嘅懸掛設定所帶嚟嘅顛簸乘車環境啦！
供款幫你計
首期：$12,399
利率：5%
年期：48期
每月供款：約$2,790
註：以上數據僅供參考
Mazda21.5Freeway規格
引擎：1,498c.c.直4DOHC
馬力：103ps/6,000rpm
扭力：14.0kgm/4,000rpm
傳動：4前速自動波，前輪驅動
車重：1,041kg
查詢：萬事得汽車（28931112）