動漫Maggie（李曼筠）、石詠莉、官恩娜、葉翠翠及徐淑敏，噚日喺屯門市廣場出席「更型更cool啓動禮」，服裝由大會安排，動漫Maggie以低胸大露背性感冠全場，成為焦點，揮低一向以性感做賣點嘅石詠莉，連官恩娜都大呼：「好羨慕佢哋兩個咁好身材，我輸咗啦！」
動漫Maggie話再同石詠莉碰面唔尷尬，但主動同佢打招呼就碰到一面灰，動漫Maggie話：「我喺後台同佢打招呼，不過佢冇睬我，可能佢聽唔到啦！但係嗰日佢哋都冇睬我。」石詠莉就堅稱有回應動漫Maggie，佢話：「我聽到佢同我sayhello，我咪hello囉！我平時都好大方，上次我邀請佢影相佢唔肯，我估係佢唔鍾意我哋老闆蕭定一，我睇過佢嘅訪問，我老闆簽我唔簽佢，唉！私人恩怨自己解決啦！」
暗寸還擊
當石詠莉被指服裝唔及動漫Maggie性感被搶風頭時，佢暗寸還擊：「我今日呢件係新衫，佢着嗰件之前陳樂榣已經着過，我冇理由又着㗎！我冇輸，新同舊唔同，就算佢唔同我影合照，我都會繼續邀請佢，我唔係面皮厚，係大方，唔係要露晒至叫靚，我呢種若隱若現先叫好。」