伯南克上個禮拜喺國會作證，確認花旗經濟大病，又衰退、又通脹、又銀根短缺，佢開出一處藥方，就係繼續減息，啲人有冇信心？睇吓上個禮拜五花旗同歐洲股市點跌法就知。最新嘅消息話，有啲地方政府已經暫停所有學生貸款，牽連性有幾大已經睇得到，唔使等到老伯講嘅銀行倒閉出現，如果見到銀行倒閉，可能已經係危機嘅尾聲。
港股今日多數冇運行，只有一啲概念股先至可以頂得吓，好似油股同金股，仲有就係國內啲建設同鐵路股，喺中鐵建（1186）招股期間，應該會有支持。
中交建C輪9105：中交建（1800）上周五收20.75元，算係偏強嘅股份，港珠澳大橋遲啲招標，中交建好大可能做牽頭，可以買啲C輪9105博吓。
隻輪現價24.1仙，有效槓桿4.4倍，正股升上23元，9105可見37仙，正股跌穿19.7元止蝕。