下晝三點零鐘，好多打工仔都會搵機會鬆一鬆，最好去食個tea充充電，否則好難捱到放工，不過做政府工未必咁他條，肚痛都要開工，都幾慘。有人向八方報料，指2月26號下晝三點半左右，見到掛住「CJ」車牌，即係終審法院首席法官李國能架專車，停咗喺北角和富道保良局余李慕芬紀念學校附近，佢好奇怪，唔通李官出巡北角？
八方向司法機構查詢，發言人話當時李官身在終院審案，並無使用座駕，司機揸架車去北角檢查維修，不過途中突感身體不適需要去洗手間，惟有泊低架車去解決個人問題。由於架車當時泊喺黃色影線上，即係不可停車等候位置，司法機構政務處會跟進。